Aqtóbe oblysy ákimdiginiń jáne Qazaqstan hokkei federatsiiasynyń bastamasymen «Aqtóbe» jastar hokkei komandasy quryldy. Aqtóbelik hokkeishilerdiń alǵashqy oiyny 7 qazan, jeksenbi kúni QR jastar chempionaty aiasynda ótti. «Aqtóbe» óz alańynda Petropavldiń «Qulagerin» qabyldady.
Match bastalmas buryn saltanatty muz shoýy bolyp, oblys ákimi Berdibek Saparbaev sharaǵa qatysýshylardy quttyqtady.
- Búgin – tarihi kún – 28 jyldan keiin tuńǵysh ret aqtóbelikter Qazaqstannyń jastar hokkei ligasyna qatysyp otyr. Bul Elbasy tapsyrmasymen júrgizilip jatqan buqaralyq sportty damytýdyń josparly jumystarynyń nátijesi. Qysqy sport túrlerimen ainalysý úshin infraqurylym damyp keledi – búgin biz Muz alańyn ashyp jatyrmyz, budan buryn birinshi «Olimp» hokkei modýli salynǵan bolatyn. Munda qazir 900-ge jýyq bala jattyǵady. Jaqynda el Prezidenti Qazaqstan halqyna joldaýyn joldap, onda buqaralyq sportty ári qarai damytý jáne zamanaýi dene shynyqtyrý – saýyqtyrý keshenderin salý mindetin qoidy. Bul baǵyttaǵy jumystar jalǵasatyn bolady, - dep atap ótti oblys ákimi.
Jastar hokkei ligasyndaǵy maýsymnyń ashylýy slovakiialyq «H+H TECHNIKA» investorlarynyń memlekettik-jeke seriktestik aiasynda salǵan jańa muz saraiynyń kúmbezi astynda ótti. Bul túrli syiymdylyqtaǵy jáne «tolyq aiaqtalǵan» logistikasymen salynǵan muz alańy qurylysynda keshendi tásildi júzege asyratyn halyqaralyq kompaniia. Kompaniia Slovakiia, Chehiia, Resei, Avstriia, Ýkraina elderiniń naryǵyna qyzmetter usynady. Kompaniianyń quryltaishylary - hokkei mektepterine basshylyq etetin kásibi hokkeishiler. Aqtóbede júzege asyrylǵan jobanyń quny - 3,8 mln teńge, onyń 70%-yn sheteldik investorlar qarjylandyrǵan.
- Dúniejúzine otyzdan asa kásibi muz aidynyn saldyq, bul bizdiń Qazaqstandaǵy alǵashqy jobamyz. Bul arena dúniejúzilik tehnologiialarǵa tolyqtai sai keledi, tipti álem chempionatyn ótkizýge de bolady. Biz jabdyqty ózimiz óndiremiz, 1993 jyldan bastap shyǵaryp kelemiz. Tehnologiia jyl saiyn jaqsarýda. Munda ornatylǵan jabdyq kóp nársege múmkindik beredi, máselen, muz temperatýrasyn baqylap otyrady, sonyń ishinde sektorlardaǵy túrli temperatýrany qalyptastyrady. Biz sondai-aq, «Aqtóbe» hokkei komandasynyń qurylýyna kómektesip, budan buryn Qazaqstannyń úsh dúrkin chempiony - «Ertis» komandasyn jattyqtyrǵan Iýliýs Penzesti Slovakiiadan bas jattyqtyrýshy bolýǵa shaqyrdyq,- dedi «H+H TECHNIKA» quryltaishylarynyń biri Ian Hovan.
Muz alańy jyl saiyn tek hokkeiden hana emes, sonymen qatar, mánerlep syrǵanaýdan, basketbol, shaǵyn fýtbol, boks, úlken tennis, gimnastikadan da kásibi jarystar ótkizýge, sondai-aq, mádeni oiyn-saýyq sharalaryn tiisti tehnikalyq dárejede ótkizýge múmkindik beredi. Sport kesheniniń jalpy aýmaǵy – 8500 sharshy metr, muz aidynynyń alańy – 28h58 metr. Arenaǵa 2500-den asa kórermen syiady.
Muz saraiynyń esigi tek kásibi sportshylar úshin ǵana emes, sonymen birge áýesqoilarǵa jáne konkimen jappai syrǵanaýǵa qatysqysy keletinderge de ashyq. Keshende alańnan bólek, májilis zaly, jattyǵý zaly, sport taýarlaryn satatyn dúken, keńseler men kafe bar.
«Aqtóbe» men «Qulager» komandalarynyń kezdesýi 7:1 esebimen aiaqtalyp, aqtóbelikterdiń paidasyna sheshildi.
