Aqtóbe oblysynda mobildi toptar az qamtylǵan jáne kópbalaly otbasylardy aralap, múmkindiginshe olardyń áleýmettik problemalaryn sheshý jumystaryn jalǵastyrýda.
Óńir basshysy bastamalyq etken aktsiia eshkimdi bei-jai qaldyrmady, oǵan qoǵam qairatkerleri, memlekettik organdardyń basshylary, eriktiler, jastar qosylyp, jergilikti kásipkerler de belsendi túrde at salysyp jatyr. Halyq arasyndaǵy áleýmettik jaǵynan az qamtylǵan ondaǵan otbasy kún saiyn azyq-túlik, kommýnaldyq qaryzdaryn tóleý, kómirmen qamtamasyz etý sekildi t.b. kómekter alýda.
«Aqtóbequrylysekspert» kompaniiasynyń direktory Jastalap Janbaýov Sádýovter otbasynyń turǵyn úi máselesin sheship berdi.
47 jastaǵy «Altyn alqa» iegeri Saltanat Sádýovanyń otbasynda segiz bala bolsa, olardyń ekeýiniń múgedektigi bar, joldasy da ekinshi toptaǵy múgedek. Otbasy osydan biraz jyl buryn balalarynyń syrqatyna bailanysty Áiteke bi aýdanynan Aqtóbege kóshipti. Oblys ortalyǵynda baspanalary bolmaǵandyqtan olar tórt jyl boiy páter jaǵalap júrgen. Endi bulai etýdiń qajeti joq.
«Osy qýanyshty sátti biz tórt jyl kúttik. Mine qamqor jandardyń, oblys basshylyǵynyń arqasynda bizdiń óz páterimiz bar. Jastalap Janbaýov – jerlesim, ózi de kóp balaly otbasynda ósti. Kómegi men qamqory úshin alyǵs aitamyn»,- dedi kóz jasyna erik bergen Saltanat Sádýova.
Kásipker: «Osyndai qaiyrymdy isten eshkim tys qalmaýy kerek. Bizder, kásipkerler muqtaj jandarǵa qoldan kelgen kómigimizdi aiamaǵanymyz jón. Biznes ókideri bul bastamaǵa qoldaý kórsetip, az qamtylǵan otbasylarǵa kómek kórsetedi dep senemin. Áriptesterim, birneshe qurylys kompaniialarynyń basshylary da kómek qolyn sozýǵa ázir. Kásipkerlerdi qoǵamdyq iske qoldan kelgen úlesterin qosýǵa shaqyramyz»,- dep atap ótti.
