Aqtóbe arheologtary qazba jumystaryn qorytyndylady. Biyl Aqtóbe qalasy mańyndaǵy Bekqul baba aýylynan erte temir dáýirine jatatyn altyn syrǵa tabyldy, dep habarlaidy "Ult aqparat".
Aqtóbe arheologtary biyl Álkei Marǵulan atyndaǵy arheologiialyq institýtymen, Resei ǵylym akademiiasynyń Shyǵystaný institýtymen birlese úsh qazba, eki ǵylymi zertteý jumysyn júrgizdi. Aqtóbe qalasy mańyndaǵy Bekqul baba aýylynda jeke turǵyn úi qurylysyn júrgizýge ruqsat bergen kezde jergilikti mamandar dabyl qaǵyp, aldymen zertteý júrgizýge kelisti. Dál sol jerden erte temir dáýirine jatatyn altyn syrǵa tabyldy.
«Biz úshin tabylǵan zattyń bári qundy. Degenmen, biyl arheologtar kópten kútken zatty tapty. Ol - erte temir dáýirine jatatyn altyn buiym. Dál osyǵan uqsas áshekei buryn Aqtóbe oblysy, Mártók aýdanynan 80-jyldary tabylǵan bolatyn. Ol kezde qazba jumystaryn arheolog Mir Qabyrbaev júrgizdi. Biz keiin izdedik, osy kúndi kúttik»,- dedi Á. Marǵulan atyndaǵy arheologiia institýtynyń Batys Qazaqstan aimaǵy boiynsha ókili, arheolog Arman Bisenbaev.
Arheologtar úshin áli de eskertkishterdi qorǵaý, qazba jumystary júrgizilmegen aimaqty aman alyp qalý qiynǵa soǵyp tur. Sebebi, munai-gaz kompaniialary qazba jumystary kezinde arheologtardy shaqyrmaidy, qajet kezde aiyppul tóleidi. Al aiyppul iri munai kompaniialary úshin tym tómen. Olar jumysty toqtatpaý úshin kóbine aiyppul tólep, jaýapkershilikten attap ótedi.
«Eskertkishterdi joiyp jatyr, biz tek qalǵanyn zertteýge shyǵamyz. Aqtóbe oblysy eskertkishterdi joiý tizimi boiynsha aldyńǵy orynda tur. Zań bar, biraq ol eskertkishterdi saqtai almaidy», - dedi Arman Bisenbaev.
