Aqtóbede erli-zaiypty azamattardan koronavirýs infektsiiasy anyqtalyp, 56 adam karantindik gospitalge jatqyzyldy, dep habarlaidy "Ult aqparat".
«Bul eki jaǵdai keshe tirkeldi. Barlyǵy oblys boiynsha 7 adam indetke shaldyqty. 1 sáýir kúni qala turǵyny emdeý mekemesine barǵan. Ol tynysy tarylyp, qyzýy kóterilgenin aitqan. Sol kezde emdeý mekemesiniń arnaiy bólmesine oqshaýlanyp, jedel járdem shaqyryldy. Provizorlyq gospitalge jatqyzylyp, qarym-qatynasta bolǵan adamdar anyqtaldy. Olar: otbasy, týystary, áriptesteri men kómek surap barǵan emdeý mekemesi. Barlyǵy 56 adam karantinge jatqyzyldy. Virýsologiialyq tekserýden soń birden arnaiy palataǵa aýystyryldy. Sodan keiin áielinen tabyldy. Ol da aýrýhanaǵa jetkizildi», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Aita keteiik, indetke shaldyqqan erli-zaiyptylar turǵan kópqabatty úidiń bir podezi karantinge jabyldy. Olar 14 kún boiy úide otyrady. Azyq-túlik pen dári-dármekke tapsyrys bere alady. Týystary da jetkizip beredi. Qazir politsiia baqylaýǵa aldy. Al taǵy 13 podezdiń turǵyndary tek jumysqa, azyq-túlik dúkenine bara alady. Sonymen birge emdeý mekemesi karantinde.
«Indet juqtyrǵan er adamnyń Almaty, Nur – Sultan qalalaryna issaparmen barǵany anyqtaldy. Keiin tekserý kezinde áielinen tabyldy. Ekeýiniń de jaǵdaiy turaqty. Qajetti em júrgizilip jatyr», - dedi oblystyq densaýlyq saqtaý basqarmasynyń basshysy Áset Qaliev.
