© AP Photo / Jean-Francois Badias
Aqtóbede eki zeinetkerdi óltirip, olardyń qyzyn kepilge alǵan er adam ómir boiyna bas bostandyǵynan aiyryldy, dep habarlaidy "Moi gorod" portaly.
Qylmys 2025 jyldyń 13 qańtarynda boldy. Qandy oqiǵa bolǵan kúni 38 jastaǵy er adam zeinetkerlerdiń úiine terezeden kirip, úi ieleriniń kelýin kútip otyrǵan. Áiel kelgen boida 20 ret pyshaq jaraqatyn salyp, jertólege tastaǵan. Osydan keiin onyń qyzyna tap berip, qol-aiaǵyn bailap tastaǵan.
Keiin otaǵasyn pyshaqtap, baltamen uryp, jertólege tastaǵan. Erli-zaiypty alǵan jaraqatynan kóz jumdy.
"Zeinetkerlerdi óltirgen adam olardyń qyzyn kepilde ustaǵan. Politsiia onymen 3 saǵat kelissóz júrgizgen. Arnaiy operatsiia kezinde olar úige basyp kirip, úi iesiniń qyzyn bosatyp, jedel járdem shaqyrǵanymen, qarttardy aman alyp qala almaǵan", - dep jazdy basylym.
Sottalýshy eki adamdy óltirdi, ómirge qaýipti kúsh qoldaný arqyly zańsyz bas bostandyǵynan aiyrdy jáne densaýlyqqa qasaqana ortasha aýyrlyqtaǵy ziian keltirdi dep aiyptaldy.
Sottalýshy marqumdardyń týystarynan keshirim surady. Otbasyly, kishkentai balasy bar ekenin, ony ósirgisi keletinin aityp, qatań jaza kesýdi, biraq ómir boiyna bas bostandyǵynan aiyrmaýdy surady.
Degenmen sot ony ómir boiyna bas bostandyǵynan aiyrý jazasyna kesti, buǵan qosa ol qaitys bolǵan zeinetkerdiń týystaryna materialdyq shyǵyn úshin 7 million teńge jáne moraldyq shyǵyn úshin 20 million teńge óteýge tiis.
