Poiyz astyna túsip, eki aiaǵynan aiyrylǵan Gúljanat Buharbaeva komissiia sheshimimen kelispei, qaita tekserýdi surap otyr, dep habarlaidy QazAqparat.
Osy jyldyń 19 tamyzy kúni Shalqar aýdanynda oqys oqiǵa tirkelgen bolatyn. 33 jastaǵy kelinshek poiyz astyna túsip, aýyr jaǵdaida aýrýhanaǵa jetkizildi. Keiin onyń týǵan-týystary túsinik berdi. Arada eki ai ótkende zardap shekken temirjolshy es jiyp, komissiia sheshimen kelispeitinin aityp berdi.
«Úsh balanyń anasymyn, temirjolshymyn. Shalqar stansasynyń kezekshisi bolyp jumys isteimin. Osy jyldyń 19 tamyz kúni túngi kezekshilikten shyǵyp, jolaýshylar poiyzynyń astyna túsip qaldym. Eki aiaǵymnan birdei airyldym. Eki aidan beri endi esimdi jiyp, óz-ózime kelip jatyrmyn. Áli de aldymda birneshe ota kútip tur. Bul oqiǵa qalai boldy? Kim kináli? Bul suraqtarǵa jaýapty ózimnen artyq eshkim bilmeidi.
Temirjoldyń jumysy óte aýyr, miyń tynyqpasa bolmaidy. Al men sońǵy aptada qatarynan 5 kún túngi kezekshilikte turdym. Adam jetispegendikten 3 adam ǵana kezekshilikte júrgenimiz taǵy bar. 18 tamyz kúni túngi kezekshiligim óte aýyr boldy. Jumysymdy bir jutym sý ishpei atqaryp shyqtym jáne buǵan deiingi basshymnyn kórsetken moraldyq qysym bar qatty sharshap, jumysty aiaqtadym. Sondai álsirep kele jatyp, poiyzdyń astyna qalai qulap ketkenimdi bilmedim. Tek keýdemdi kóterip, shyǵa aldym. Osydan keiin is qozǵalyp, tergeý bastaldy. Oblystyń eńbek inspektsiiasyna shaǵymdandym. Komissiia quryldy. Biraq komissiia ózimdi kináli qylyp shyǵardy. Meniń bundai kúige qalai túskenimdi teksermedi. Tekserýge qatysty kúmánim kóp, aldaǵy ýaqytta sotqa shaǵymdanamyn. Osy máseleni oblystyq prokýratýra jan-jaqty tekserip, adal sheshim shyǵarsa eken deimin. «Qazaqstan temirjoly» UK» AQ basshylyǵyna bul sýitsid emes, óndiristik jaǵdai ekenin aitamyn», - dedi Gúljanat Buharbaeva.
Aqtóbe oblystyq eńbek inspektsiiasy basqarmasy bul bir mamannyń emes, komissiia sheshimi dep otyr. Qorytyndysy – óndiristik jaraqat emes.
«Komissiia quramynda úsh adam bar. Olar: eńbek inspektory, kásipodaq pen temirjol stansasynyń basshylyǵy. Gúljanat Buharbaeva 7 jyldan astam ýaqyt osy qyzmette eńbek etken. Tańerteń jumystan shyǵady, kezekshiligin tapsyrady. Keiin úiine barý úshin joldy belgilenbegen jermen kesip ótip, arǵy betke ótetin esik jabyq turǵan soń stansaǵa qaita oralady. Qaýipsizdik erejesin biletin temirjolshy taǵy da belgilenbegen jermen ótip, poiyz qozǵalǵan kezde qulap qalǵan. Komissiia qorytyndysy boiynsha bul óndiristik jaraqat emes. Sebebi ol dál sol jerde jumys berýshiniń tapsyrmasymen júrgen joq. Negizi kezekshilik qyzmette 7 adam tirkeýde tur. Onyń biri bala kútimimen otyr, ekinshisi kezekti eńbek demalysynda. Bes adam jumys istep, aýysqan. Kezekshilerdiń jumys kestesi saqtalmaǵany ras. Eńbek kodeksi boiynsha aýysym men demalys arasy 12 saǵattan kem bolmaýy tiis. Bul talap saqtalǵan», - dedi Aqtóbe oblystyq eńbek inspektsiiasy basqarmasynyń bólim basshysy Talǵat Iskarin.
