Aqtóbede aldymen pedagog, meditsina qyzmetkerleri men quqyq qorǵaýshylar COVID-19-ǵa qarsy vaktsina qabyldaidy. Ázirge naqty tizimi jasalmady. Bul týraly óńirlik kommýnikatsiialar qyzmetinde ótken baspasóz máslihatynda oblystyq densaýlyq saqtaý basqarmasy basshysynyń orynbasary Bekbolat Izbasarov aitty, dep habarlaidy "Ult aqparat".
Aqtóbe oblysy boiynsha ótken táýlikte 10 adamnan koronavirýs infektsiiasy anyqtaldy. Onyń basym bóligi Aqtóbe qalasynyń turǵyny.
«Aqtóbe oblysy «jasyl» aimaqta tur. Epidemiologiialyq ahýal birqalypty. Degenmen arqany keńge salýǵa bolmaidy. Qańtar, aqpan ailarynda infektsiianyń ósýi deńgeii baiqalýy múmkin. Aldymyzda infektsiia kóp tirkelgen maýsym, shilde ailary da kele jatyr», - dedi oblystyq sanitarlyq-epidemiologiialyq baqylaý departamenti basshysynyń orynbasary Muhtar Serbaev.
Aita keteiik, óńirde barlyǵy 3763 jaǵdai tirkelip, onyń basym bóligi jazyldy. Qazirgi kezde barlyǵy 96 naýqas em qabyldap jatyr. Onyń ishinde 47-i infektsiialyq statsionarda.
«Qazirgi kezde vaktsina qabyldaýǵa niet bildirýshiler tizimi jasalmady. Sebebi vaktsina áli kelgen joq. Aldymen meditsina qyzmetkeri, pedagogtar men quqyq qorǵaýshylar qabyldaidy. Bári erikti túrde júrgiziledi. Shamamen oblys boiynsha 150 myń adamǵa ekpe jasaýdy josparlap otyrmyz», - dedi oblystyq densaýlyq saqtaý basqarmasy basshysynyń orynbasary Bekbolat Izbasarov.
