sýret ashyq derekkózden alyndy
Aqtóbede 1 jasar bala kóz jumyp, ony ata-anasy tórt kún boiy jerlemei, úiinde ustaǵan. Qazir oqiǵa boiynsha qylmystyq is qozǵalyp, tergeý júrip jatyr, dep habarlaidy QazAqparat agenttigi.
Aqtóbe qalasynda 1 jasar bala jumbaq jaǵdaida kóz jumyp, onyń janynda bolǵan 4 jasar bala «Aiala» ómirlik qiyn jaǵdaiǵa tap bolǵan balalar ortalyǵyna jiberildi.
Qazir sábi óliminen soń is qozǵalyp, tergeý júrip jatyr.
Búgin óńirlik kommýnikatsiialar qyzmetinde bilim, densaýlyq saqtaý basqarmalarynyń ókilderi men politsiia mán-jaidy aityp berdi.
«Jalpy bul otbasynda 5 bala bolǵan. Úsh balasy bir ákeden, eki balasy ekinshi ákeden. Bir balasy 2014 jyly týabitti júrek aýrýynan kóz jumǵan. Úsh bala bolǵan kezde anasy ata-ana quqyǵynan aiyryldy. Sol kezde bireýi Jaisań mektep-internatyna, ekinshisi «Jaina» ońaltý ortalyǵyna, úshinshisi «Aiala» ońaltý ortalyǵyna ornalastyryldy. Alaida kishkentaiyn ákesi sot arqyly óz atyna jazdyryp, tegin berdi. Sóitip ońaltý ortalyǵynan balany ózine alady. 2022 jyly taǵy bir bala dúniege keledi. Baqylaý, tekserý kezinde politsiia olardy taǵy ata-ana quqyǵynan aiyrý úshin aryz túsiredi. Byltyr qazan aiynda balalary sábiler úiine tapsyrylyp, keiin ata-anasyna berildi. Iaǵni, eki bala ata-anasymen birge turǵan. Buryn Aqtóbe qalasy Máskeý aýdany, keiin Iasnoe aýyly turǵylyqty jeri bolyp sanaldy», - dedi oblystyq JPQB bastyǵy Ardana Saimaǵambetov.
Balalardy Aqtóbe qalasy bilim bóliminiń janyndaǵy qorǵanshylyq jáne qamqorshylyq keńesi de baqylaýǵa alǵan.
«Ata-anasynyń ishimdikke salynǵany belgili bolyp, byltyr qazan aiynda balalar «Úmit» sábi úiine ornalastyryldy. Biraq ákesi qorǵanshylyq jáne qamqorshylyq keńeske ótinish túsiredi. Ákesi ákelik quqyǵynan aiyrylmaǵan. Jumysy bar, esepte turmaǵany jóninde anyqtama berip, bala otbasyna jiberiledi. «Úmit» sábiler úiiniń mamandary da kishkentai sábi úshin ana súti mańyzdy ekenin aitqan. Bala týǵan ákesine qaitarylǵanǵa deiin qalalyq bilim bóliminiń mamany turǵylyqty úiine baryp, zertteý júrgizgen. Óndiristik baza janynda arnaiy bólme salynǵan. Balalar turýǵa múmkindik boldy. Jeltoqsan aiynda da tekserip bardy. Bári qalypty edi», - dedi oblystyq bilim basqarmasy basshysynyń orynbasary Dina Jamanbaeva.
Bul otbasyny dárigerler de óz baqylaýyna almaq bolǵan. Biraq anasy balalaryna eshqandai ekpe jasatpaǵan, tipti bir de bir ret tekserýge aparmaǵan.
«Bala 2022 jyly 2 aqpanda kesir tiligimen ómirge ákeldi. Anasy júktilik kezinde eshqandai da dárigerge qaralmaǵan. Týǵan kezde balanyń salmaǵy 1998 gramm boldy. Boiy 47 sm. Perzenthanadan jaqsy jaǵdaida shyǵady. Keiin ýchaskelik dárigerlerge beriledi. Degenmen meditsina qyzmetkerleri barǵan kezde adamdar úiinde bolmaidy. Turǵylyqty jeri ózgerip, kóship-qonyp júrgen. Saldarynan eshqandai vaktsina almady. Balada temir jetispeýshiligi diagnozy bolǵan», - dedi oblystyq densaýlyq saqtaý basqarmasy basshysynyń orynbasary Baqyt Túlkibaeva.
Sábi 1 jas 21 kún tolǵanda kóz jumdy. Dárigerler anasynan surap-bilgende sábi qusyp, ishi ótip, kenetten qaitys bolǵan. Naqty diagnozy sot-meditsinalyq saraptamadan soń anyqtalady.
Qazir oqiǵaǵa bailanysty Qylmystyq kodekstiń 141-baby boiynsha is qozǵalǵan.
Óz mindetin tiisti oryndamaǵany úshin ata-anasyna qatysty tergeý júrip jatyr.
