19 qarasha kúni Aqtóbe qalasynyń irgesindegi Bestamaq aýylynyń júz shaqty turǵyny narazylyqqa shyǵyp aýyl irgesindegi shoshqa fermasynyń jabylýyn talap etti, dep habarlaidy Azattyq.
Turǵyndardyń sózinshe, 2002 jyly ashylǵan keshende qazir 40 myń bas shoshqa bar. Jergilikti jurt ferma jaqtan jel turǵanda úiden shyǵa almai qalatynyn aitady.
– Sońǵy kezderi bul ferma shoshqanyń ishek-qaryn, terisin jáne óleksesin aýyl mańynan transheia qazyp, soǵan kóme bastady. Sharýashylyq qaldyqtaryn joiý, bolmasa óńdeý qymbatqa shyǵatyn bolsa kerek. Aýyl turǵyndarynyń qysy-jazy tunshyǵyp otyrǵany óz aldyna, shoshqa fermasy jerdi, sýdy lastap jatyr, – deidi Erbolat Kenetaev.
Bestamaqtyń taǵy bir turǵyny Salamat Nurǵalievtiń sózinshe, shoshqa fermasynyń suiyq qaldyqtary Elek ózenine aǵyp jatyr. "Biz Elektiń sýymen baqshany sýǵaramyz, malymyz da ózennen sý ishedi. Ala jazdai úlken-kishi osy ózenge shomylady" deidi Salamat Nurǵaliev.
Shoshqa fermasynyń jabylýyn talap etken jiynǵa sol mańdaǵy Qaraǵash, Besqospa aýyldarynyń turǵyndary da kelgen. Aty-jónin atamaǵan turǵynnyń aitýynsha, shoshqa fermasynyń jaǵymsyz iisinen 10 shaqyrym jerdegi Besqospa aýyly da tunshyǵyp otyr.
Júz shaqty adamnyń narazylyǵyn tyńdaýǵa Alǵa aýdanynyń ákimi Mamyrǵali Aqqaǵazov keldi. Aýdan ákimi halyqty sabyrǵa shaqyryp, arnaiy komissiia qurylǵanyn, máseleniń tekserilip jatqanyn aitty.
Ózin "Bestamaq aýylsharýashylyq kesheniniń atqarýshy direktorymyn" dep tanystyrǵan Nurym Qumarov shoshqa óleksesi men ishek-qarnyn 20 kúnnen beri ferma irgesindegi transheialarǵa kómip jatqanyn rastady.
– Biz buryn shoshqa óndirisiniń qaldyǵyn mal azyǵyna qosý úshin óńdeitinbiz. Biri myńdyq, biri bes júzdik eki ekstrýderimiz bar edi. Sonyń biri synyp qalyp, qaldyqtardy jerge kómýge májbúrmiz. Sońǵy 20 kúnde ferma mańyndaǵy transheialarǵa alty tonna qaldyq kómildi, – dedi Nurym Qumarov.
Oblys ákiminiń orynbasary Amanǵali Berdalin de bul oqiǵaǵa bailanysty mán-jaidy túsindirdi.
«Oblys ákimi Ońdasyn Orazalinniń tapsyrmasyna sáikes shoshqa fermasyna bardyq. Yntaly toptan on adam, quzyrly organ ókilderi men ekologiia, veterinariia mamandary komissiia quramynda bar. Shaǵyn jáne orta biznesti tekserýge moratorii salynǵanyn umytpaǵan jón. Qazir ruqsat alyp jatyrmyz. Búginnen bastap tekserý aiaqtalǵansha shoshqa soiýǵa tyiym salyndy», - dedi oblys ákiminiń orynbasary Amanǵali Berdalin.
Al oblystyq ekologiia departamenti mundai aryz buryn túspegenin, búgin ǵana shaǵym berilgenin málimededi.
«Baryp, mamandar jaǵdaimen tanysty. Bestamaq aýyly turǵyndary atynan aryz tústi. Endi tekserý bastalady. Kásipkerge tekseretinimiz týraly habarlama berdik. Ekologiialyq zańdylyqty buzǵany anyq kórinip tur», - dedi oblystyq ekologiia departamentiniń basshysy Nurjan Aqqul.
