Aqtóbede jalpy qalalyq senbilikterdi ótkizý jalǵasýda. Qalanyń turǵyndary, memlekettik qyzmetshiler, kásiporyndar men uiymdardyń qyzmetkerleri kúrekterin qolǵa alyp, oblys ortalyǵynda 10 myńnan astam aǵash otyrǵyzdy.
Bul sharadan oblystyń basshylyǵy da qalys qalmady. Oblys ákimi Berdibek Saparbaev «Dostyq» saiabaǵynyń kógaldandyrý jumysyna qatysty. Búgingi kúni onyń aýmaǵynda Qytaidan, Túrkiiadan, Germaniiadan, Slovakiiadan, Reseiden jáne basqa elderden kelgen 50 sheteldik kompaniialardyń ujymdary 1000-nan astam kóshet otyrǵyzý jumystaryn júrgizýde.
«Kún ótken saiyn Aqtóbe ádemilenip keledi. Memleket basshysynyń tapsyrmasyna sáikes, ekologiiany jaqsartý jáne qalany kógaldandyrý máselelerine erekshe kóńil bólinip, Aqtóbe turǵyndarynyń bos ýaqytyn ótkizý úshin qolaily jaǵdailar jasalýda. Tek sońǵy úsh jylda Aqtóbede 48 jańa saiabaq jáne alańdar ashyldy», - dedi oblys ákimi.
Ol sondai-aq azamattardy oblys ortalyǵyn abattandyrýǵa jáne kógaldandyrýǵa belsene qatysýǵa shaqyrdy.
Senbilikke 8 myńnan astam adam men 100 tehnika jumyldyryldy, saiabaqtar, alańdar men kósheler 1,3 mln. sharshy metr aýmaq tazartyldy. Qoqys alańyna 70 tonna qoqys aparyldy. 10 myń kóshet (tal, qaraǵai, aqqaiyń, terek, alma) jáne 500 buta otyrǵyzyldy.
Tabiǵat jáne tabiǵat resýrstaryn paidalaný basqarmasynyń málimetinshe osy jyldyń kúzinde Aqtóbe oblysynda 40 myńnan astam aǵash otyrǵyzylady.
