QR Prezidenti Nursultan Nazarbaevtyń Aqtóbede ótip jatqan «Anaǵa taǵzym» analar sletiniń qatysýshylaryna arnalǵan quttyqtaý sózin Aqtóbe oblysynyń ákimi Berdibek Saparbaev oqyp berdi.
- «Rýhani jańǵyrý» baǵdarlamasynyń aiasynda alǵash ret ótkizilip jatqan Analar sleti – elimizdegi otbasylyq ahýaldy jaqsartýǵa baǵyttalǵan asa mańyzdy shara. Ana – árbir shańyraqtyń, sondai-aq tutas Otanymyzdyń tiregi. Al qazaqstandyq analardyń áleýmettik jaǵdaiy jaqsy bolyp, urpaǵynyń bolashaǵyna alańdamai, baqytty ǵumyr keshýi – men úshin eń basty maqsattardyń biri. Sol sebepti «Qazaqstan-2050» strategiiasynda «ana men balany qorǵaý – memlekettiń áleýmettik saiasatynyń mańyzdy bóligi» dep jariialadym,- delingen Elbasynyń quttyqtaý sózinde. Sonymen qatar, memleket basshysy Nursultan Nazarbaev Slet qatysýshylarynyń jumysyna jemis tilegen.
Eki kúndik sletke Qazaqstannyń túpkir-túpkirinen kelgen barlyǵy 1200-den asa delegat jinaldy. Sharanyń basty qatysýshylary – mádeniet, sport, biznes, bilim men ǵylymnyń damýyna úles qosqan áielder, kóp balaly analar.
Slettiń saltanatty ashylýy kezinde oblys ákimi Berdibek Saparbaev sharanyń basty maqsaty qoǵam men biliktiń otbasy qundylyqtary men ult densaýlyǵyn qorǵaýda, óskeleń urpaqty tárbieleýde birigýi, otbasyn, ana men balany qoldaý úshin usynystar ázirleý bolyp tabylatynyn atap ótti.
- Búginde qoǵamnyń, ásirese jastardyń rýhani jáne moraldyq deniniń saýlyǵy birinshi kezekte. Munda jeke-jeke alǵandaǵy árbir otbasynyń «densaýlyǵynyń» mańyzy zor, -dep atap ótti oblys ákimi óziniń sózinde.
Ol eldiń bolashaǵy úshin óskeleń urpaqty tárbieleýdegi problemalarǵa qoǵamnyń enjar qaraýyna quqyǵy joq ekenin atap ótti.
- Kámelet jasqa tolmaǵandar arasyndaǵy qylmys, jas otbasylardyń ajyrasýy, erte júktilik – osynyń bári tárbie berý kezinde jiberilgen olqylyqtardyń nátijesi. Bul problemalar bizdiń árqaisysymyzdy tolǵandyrady. Búgin biz kún tártibindegi suraqty konstrýktivti talqylap qana qoimai, osy problemalardy sheshýde naqty usynystardy ázirleimiz dep úmittenemin,-dedi Berdibek Saparbaev.
Shara kezinde sondai-aq, KSRO halyq ártisi Bibigúl Tólegenova, Sotsialistik eńbek eri Vera Sidorova, balalar quqyqtary jónindegi ýákil, senat depýtaty Sáýle Aitbaeva, QR eńbek sińizgen qairatkeri M.Aitqojina, QR Eńbek sińirgen qairatkeri Altynshash Jaǵanova sóz sóiledi.
Aita keteiik, Aqtóbe oblysynda biyl rýhani-adamgershilik qundylyqtardy, neke jáne otbasy institýtyn qoǵam men memlekettiń turaqtylyǵy men amandyǵyn saqtaýdyń negizgi quraly retinde nyǵaitý.
Máselen, 2018 jyl óńirde «Baqytty bala» jyly bolyp jariialanǵan bolatyn. Sonyń aiasynda balalarǵa tárbie berý, saýyqtyrý jáne bilim berý jobalaryn júzege asyrýǵa 4,7 mlrd teńge aýdaryldy. Budan basqa, demeýshilerdiń qarajattary belsendi tartylýda. Osy jyldyń shilde aiynda Aqtóbede respýblikalyq ákeler forýmy ótken bolatyn. ákeler alleiasy ashyldy. Budan ózge Sletti ótkizý kúnderinde Aqtóbede respýblikadaǵy tuńǵysh «Anaǵa taǵzym» rýhani-adamgershilik tárbie berý ortalyǵy men analar alleiasy ashyldy. Nysan mazmuny jaǵynan ǵana biregei emes, ǵimarattyń dizainy da nazar aýdarýǵa turarlyq, keshen ananyń aq jaýlyǵy ispetti turǵyzylǵan.
