Aqtóbede tek oblys ákimdiginiń ǵimaraty búlindi. Qazirgi kezde shyǵyn kólemi shamamen 300 million teńge dep boljanyp otyr. Bul týraly oblys ákiminiń birinshi orynbasary Rýslan Hambarov Óńirlik kommýnikatsiialar qyzmetinde ótken tikelei efir kezinde aitty, dep habarlaidy QazAqparat.
Aqtóbede beibit sherý bastalǵan kezde oblys ákimdiginiń aldyna 2 myńǵa jýyq adam jinalǵan. Oblys ákiminiń birinshi orynbasary Rýslan Hambarovtyń aitýynsha, olar birneshe máseleni kóterdi.
«Bastapqy talaptary - gaz baǵasyn tómendetý, azyq-túlik baǵasynyń ósýin tejeý jáne jalaqyny kóterý boldy. Ári qarai Úkimet quramyn almastyrý siiaqty saiasi sipattaǵy talaptar qoiyldy. Osyǵan bailanysty, oblys ákimdigi tarapynan, narazy toppen bailanys ornatý jáne túsindirý jumystaryn júrgizý boiynsha áreketter jasaldy. Alaida arnaiy arandatýshylarǵa jáne mitingtiń stihiialyq kórinis alýyna bailanysty, syndarly dialog qurý múmkin bolmady. Shynyn aitý kerek, jinalǵan jurt ákim nemese ákimniń orynbasarlaryn tyńdaýǵa qulqy da, nieti de bolǵan joq», - dedi Aqtóbe oblysy ákiminiń birinshi orynbasary Rýslan Hambarov.
Onyń aitýynsha, oblys aýdandarynda narazylyq aktsiialary ótkizilgen. Narazylyq bildirýshiler «Aqtóbe-Astrahan», «Samara-Shymkent», «Qarabutaq-Qostanai», «Qandyaǵash-Embi» tasjoldaryn jaýyp tastaǵan. Sonymen birge temirjol stantsiialarynda qozǵalys toqtatylǵan.
Aita keteiik, jalpy oblys boiynsha qoǵamdyq tártipti qamtamasyz etý úshin 2000-ǵa jýyq politsiia jáne Ulttyq ulannyń áskeri qyzmetshileri tartyldy. Jappai tártipsizdik kezinde 17 politsiia qyzmetkeri jaraqat alǵan. Qazir 2 qyzmetker aýrýhanada em alyp jatyr.
«Qazirgi ýaqytta, oblys boiynsha jaǵdai birqalypty. Barlyq tirshilikke qajetti nysan, qoǵamdyq kólikter shtattyq rejimde jumys istep tur. Sondai-aq, iri óndiris kásiporyndary jáne qarjy mekemeleri óz jumystaryn jandandyrdy. Derekterge sáikes, Aqtóbe oblysy ákimdigi ǵimaratynan basqa strategiialyq nysandar (aeroport, energetikalyq nysandar) jáne shaǵyn orta biznester zardap shekken joq. Tek oblys ákimdiginde orgtehnikalardy alyp ketken. Qazirgi kezde shyǵyn kólemin 300 mln teńge dep boljanyp otyr», - dedi Rýslan Hambarov.
