Foto:diapazon.kz
Aqtóbelik dárigerler búldirshinge durys diagnoz qoia almai, bir aýrýhanadan ekinshisine jiberip ýaqyt joǵaltqan. Nátijesinde jaǵdaiy saǵat saiyn nasharlai túsken 5 jasar Ińkár aýrýhanada jan tapsyrǵan. Balanyń anasy meditsinalyq mekemelerdi sotqa berdi, dep habarlaidy Azattyq Ruhy saity Diapazon aqparattyq portalyna silteme jasap.
Qaiǵyly oqiǵa 2019 jyly boldy. 11 qazanda 5 jasar Ińkárdiń kenetten temperatýrasy kóterilgen, №2 emhanananyń aq halattylary tek dári-dármekter taǵaiyndap, balany anasymen úiine keri qaitarǵan.
«Kelesi kúni Ińkárdiń jaǵdaiy nasharlai tústi, ol tipti otyra da almady. Qyzymdy oblystyq balalar aýrýhanasyna apardym, ol demalys kúni bolatyn, dárigerlerdi 4 saǵat kúttik, balanyń jaǵdaiy nasharlai berdi. Sodan soń KT-ǵa túsirip, taldaýlar jasady. Al odan keiin Ińkárdi juqpaly aýrýlar aýrýhanasyna, sodan soń meditsinalyq jedel-járdem aýrýhanasyna, sosyn qaitadan juqpaly aýrýlar aýrýhanasyna jetkizdi. Ol jerde balaǵa pýnktsiia jasady, balanyń jaǵdaiy nasharlai tústi. 13 qazanda tústen keiin Ińkár qaitys boldy, ólimnen keiingi diagnoz «enterovirýstyq infektsiia». Enterovirýstyq meningoentsefalit, aýyr túri. Mi isigi», - dep túsindirdi marqum búldirshinniń anasy.
Bala qaitys bolǵannan keiin politsiia «meditsina qyzmetkerleriniń kásibi mindetterin tiisinshe oryndamaýy» baby boiynsha qylmystyq is qozǵady. Keiinirek ol qylmys quramynyń bolmaýyna bailanysty toqtatyldy. Tergeý bul jerde tek ákimshilik quqyq buzýshylyq belgileri bar degen qorytyndyǵa keldi.
Ińkárdiń anasy № 2 emhanaǵa, juqpaly aýrýlar aýrýhanasyna jáne densaýlyq saqtaý basqarmasyna qatysty sotqa talap-aryzyn jazyp, moraldyq ziian úshin 10 million teńge ótemaqy talap etti. Jaýapkerler talap-aryzdardy moiyndamady.
Sýdia Býivarenko is boiynsha barlyq saraptamalardy zerttedi jáne ýchaskelik pediatr balanyń jaǵdaiyn jete baǵalamady, aýrýdyń tolyq tarihyn jinamady degen tujyrymdarmen kelisti. Meditsinalyq jáne farmatsevtikalyq baqylaý komitetiniń departamenti densaýlyq saqtaý ministrliginiń buiryqtarynyń buzylǵanyn anyqtady. Máselen, ótinish túskennen keiin balany infektsionistke qaratýǵa jáne aýrýhanaǵa jatqyzýǵa jiberý kerek edi. Al sot saraptamasy ortalyǵynyń sarapshylary meditsinalyq kómekke birinshi ret júgingen kezdegi jaǵdaidyń baǵalanbaýyna bailanysty Ińkár shuǵyl diagnostika men emdeý úshin aýrýhanaǵa jatqyzylmaǵanyn, balanyń jaǵdaiy óte aýyr bolǵanymen, konsiliým shaqyrylmaǵanyn anyqtady. Ambýlatoriialyq emdeýden keiin 20 saǵat ishinde bala kómeksiz qaldy jáne onyń jaǵdaiy birtindep nasharlady.
«Mamandardyń patsientke nemquraily qaraýy bul jaǵdaida ómirge qaýip tóndiretin asqynýlardyń damýyna jáne ólimge ákeldi», – dep qorytyndylady sýdia Býivarenko.
Osylaisha, sot qaitys bolǵan Ińkárdiń anasynyń meditsinalyq mekemelerden moraldyq ziiandy óteý týraly talaptaryn negizdi dep tapty, biraq zalal mólsherin azaitty.
Sot infektsiialyq aýrýhanany, №2 emhanany jáne densaýlyq saqtaý basqarmasyn talapkerge moraldyq ziian úshin 5 million teńge tóleýge mindettedi.
