Aqtóbe oblysynda kóktemgi sý tasqynyna daiyndyq júrip jatyr. Óńirde sý basý qaýpi basym 30 eldi meken bar, dep habarlaidy "Ult aqparat".
Aqtóbe oblystyq tótenshe jaǵdailar departamenti óńirlik kommýnikatsiialar qyzmetinde kóktemgi sý tasqynyna daiyndyq jumystaryn baiandady. Jol kartasy daiyn. Aqtóbe oblysynda barlyǵy sý basý qaýpi basym 30 eldi meken bar. Onda 11 myńnan astam adam turady.
«Ózen arnasy tasyp, qar tez erigende ǵana qaýip tónýi múmkin. Biraq biyl úsh iri sý qoimasynda da sý az. Máselen, Aqtóbe sý qoimasy 21, Qarǵaly 13 paiyzǵa ǵana toldy. Sebebi kúzde jańbyr az jaýyp, ylǵaldylyq 28 mm qurady. Qajetti normanyń tek 62 % kórsetti. Sonymen birge toń 77 sm qurap otyr. Keshe ǵana qar jaýdy. Onyń áserin naýryz aiynda naqty aita alamyz», - dedi Aqtóbe oblysy tótenshe jaǵdailar departamenti, tótenshe jaǵdailardyń aldyn alý basqarmasynyń bastyǵy Qumar Turmaǵambetov.
Aita keteiik, qazirgi kezde 80 tonna janar-jaǵarmai, 13 myń adamǵa arnalǵan 76 ýaqytsha ornalastyrý beketi ázir. Qutqarý jumystaryn júrgizýge 1500-den astam adam, 467 tehnika, 73 júzý quraly, 229 motopompa daiyndaldy. Áli kúnge deiin qala men eldi mekenderde qar jinaý jumysy jalǵasyp jatyr. Búginge deiin 154 myń tekshe metr qar shyǵaryldy.
