Aqtóbe mamandandyrylǵan aýdanaralyq soty ózge dindegilerge qarsy qarýly jihad jasaýǵa úgittegen qala turǵyndaryna úkim shyǵardy. Janasyl Jubatov 15 jylǵa, Álibek Áliev 13 jylǵa bas bostandyǵynan aiyryldy.
Jubatov pen Áliev radikaldy dini aǵymdy ustanyp, DAISh ideologiiasyn qoldaǵan, dep esepteidi tergeýshiler. Tanystaryna ózge dindegilerge qarsy terakt jasaýdy nasihattaityn videorolikterdi kórsetken. Jubatov "Pallada" dúkenine baryp, ózine tanys satýshydan Makarov tapanshasynyń oǵy men 16-shy kalibrli ańshy myltyǵyn satýdy suraǵan.
Qylmystyq is materialynda olar ákimdiktiń 100 qyzmetkerin qala syrtyna alyp shyǵyp, óltirgisi kelgeni aitylady. Oiyndaǵysyn iske asyrý úshin Jubatov tanysyna ákimdikke jumysqa turyp, qyzmetkerler jumysqa qashan kelip, qashan ketetinin habarlap otyrýdy usynǵan. Sondai-aq olar ekstremizm týraly isti qaraǵan sýdiany óltirip, onyń aqshasyn DAISh terroristerine qosylý úshin jolǵa jumsaýdy josparlap qoiǵan.
Jubatov pen Áliev ózge dindegilerge qarsy qarýly jihad jasaýǵa úgittegen. Otarda áskeri boryshyn ótegen bir tanysynan 3 million teńgege avtomat, granatomet jáne ózge de qarýlardy satyp alýǵa kómektesýin suraǵan. Jarylǵysh qurylǵy jasap, UQKD ǵimaratyn jaryp jiberý aiyptalýshylardyń josparynda bolǵan.
Sotta ekeýi de terrorizmdi nasihattap, ult arazdyǵyn qozdyrǵanyn, lańkestik topty uiymdastyryp, qatysqanyn moiyndamady, dep jazdy "Diapazon".
"Úiden qorap alyp shyqty, onda bolttar, gaikalar, tisteýik, silikon, dánekerleý maiy, sym boldy. Kez kelgen erkek balkonda qural-saiman ustaidy, úide jóndeý jumystaryn júrgizdim. Al maǵan jarylǵysh qurylǵynyń komponentterin saqtady degen aiyp taqty", - dedi sotta Áliev.
Úkim shyǵarylǵannan keiin sottalǵandardyń analary jýrnalisterge uldaryna qysym jasap, uryp-soǵyp, isti qoldan jasaǵanyn málimdedi.
"Ákimdiktiń 100 qyzmetkerin qala syrtyna alyp shyqpaqshy bolǵan dep aiyptady. Oǵan ekeýiniń shamasy kele me? Mundai iske bútin bir ásker, aqsha kerek. Eger moiyndamasań, áielińdi 5 jylǵa túrmege otyrǵyzyp, balalaryńdy balalar úiine jiberedi dep aitqan. Ulym qol qoiýǵa bergen qaǵazyn tipti oqymadym da deidi. Onyń esh kinási joq, úkimge shaǵymdanamyz", - deidi Álibek Álievtiń anasy.
