Aqtóbede jazǵy lager tárbieshisi bolǵan Álibi Ótepbergenge qatysty qylmystyq istiń úkimi ózgerissiz qaldy. Buǵan deiin oǵan 10 jylǵa bas bostandyǵynan aiyrý jazasy taǵaiyndalǵan bolatyn, dep habarlaidy "Ult aqparat".
Osydan bir jyl buryn jazǵy lagerge balalaryn jibergen ata-analar aryz túsirip, tálimgerge qatysty Qylmystyq kodekstiń 124-baby 3-bóligimen is qozǵalǵan edi. Istiń úkimi biyl shyǵyp, sottalýshy tarap apelliatsiiaǵa berdi.
Aqtóbe oblysynyń qylmystyq ister jónindegi mamandandyrylǵan aýdanaralyq sotynyń 26 naýryzdaǵy úkimimen Á.Ótepbergen Qylmystyq kodekstiń 124-baby 3-bóligimen aiypty dep tanylyp, 10 jyl merzimge bas bostandyǵynan aiyryldy. Sondai-aq oǵan pedagogikalyq jáne kámeletke tolmaǵandarmen jumys isteýge bailanysty laýazymdardy atqarýǵa ómir boiyna tyiym salynǵan bolatyn.
«Úkim boiynsha Á.Ótepbergen jazǵy demalys lageriniń tárbieshisi bola tura birneshe balaǵa qatysty seksýaldyq sipattaǵy azǵyndyq áreketter jasaǵan. Búgin Aqtóbe oblystyq sotynyń qylmystyq ister jónindegi sot alqasy úkimdi ózgerissiz qaldyrdy. Qylmystyq ister jónindegi sot alqasy sottalǵannyń qorǵaýshylarynyń ótinishi boiynsha sot tergeýin qaita bastaǵan bolatyn. Qosymsha kýágerler men jábirlenýshilerdiń zańdy ókilderinen jaýap alyndy. Sot alqasy Á.Ótepbergenniń kinási tolyq dáleldengen, is boiynsha tergeý jan-jaqty, tolyq jáne obektivti júrgizilgen degen tujyrymǵa keldi», - dep habarlady oblystyq sottyń baspasóz qyzmetinen.
Sonymen birge áleýmettik jeli arqyly taraǵan habarlamalarǵa qatysty baspasóz qyzmeti pikir bildirdi.
«Á.Ótepbergenge qatysty qylmystyq is qylmystyq-protsesýaldyq zań talabyna sáikes jabyq sot otyrysynda qaraldy. Is materialdarynan múldem beihabar adamdar, áleýmettik jeli qoldanýshylary «Á.Ótepbergenge qatysty ádiletsiz sot sheshimi qabyldandy, is boiynsha dáleldemeler joq, jalǵan aiyp boiynsha sot sheshim qabyldady» dep shyndyqqa sáikes kelmeitin pikirlerdi belsendi taratty. Sot tergeýinde is boiynsha barlyq dáleldemeler, jábirlenýshilerdiń, olardyń zańdy ókilderiniń, kýálardyń jaýaptary, sot saraptamasynyń qorytyndylary, zańmen belgilengen tártippen, iaǵni sottalǵannyń qylmystyq áreketti jasaǵany nemese jasamaǵany, onyń kináliligi tolyq, jan-jaqty tekserilgen. QR QK-niń 11-babyna sáikes Á.Ótepbergen jasaǵan is asa aýyr qylmystar sanatyna jatady jáne atalǵan baptyń sanktsiiasynda on jyldan on bes jylǵa deiin bas bostandyǵynan aiyrý jazasy kózdelgen. Jaza taǵaiyndaǵanda sot Á.Ótepbergenniń jasyn, jaqsy minezdemeni, sotty bolmaǵanyn eskerip, QK-niń 124-babynyń 3-bóliginde kózdelgen sanktsiianyń eń tómengi sheginde taǵaiyndaǵan», - dedi oblystyq sottyń baspasóz qyzmetinen.
Aita keteiik, áleýmettik jeli paidalanýshylary Á.Ótepbergenge qoldaý bildirip, #Álibigeádildik heshtegimen jazbalar qaldyrýda.
