Foto: QazAqparat
Búgin qazaq eli qoǵam qairatkeri, ǵalym Amangeldi Aitalymen qoshtasty. Qoshtasý rásiminde Prezident Qasym-Jomart Toqaevtyń jedelhaty oqyldy, dep habarlaidy QazAqparat agenttigi.
Aqtóbe jurtshylyǵy belgili qoǵam qairatkeri, filosofiia ǵylymdarynyń doktory, professor, QR áleýmettik ǵylym akademiiasynyń akademigi, QR Bilim berý isiniń Qurmetti qyzmetkeri, Aqtóbe qalasynyń qurmetti azamaty Amangeldi Ábdirahmanuly Aitalyny sońǵy saparǵa shyǵaryp saldy.
Rásim ózi dáris bergen Q.Jubanov atyndaǵy Aqtóbe óńirlik ýniversitetinde ótti.
JOO baspasóz qyzmetiniń habarlaýynsha, qoshtasý rásimine oblys basshysy Eraly Toǵjanov qatysyp, Prezident Qasym-Jomart Toqaevtyń kóńil aitý jedelhatyn oqyp berdi.
«Asa kórnekti ǵalym, qoǵam qairatkeri, Qazaqstan Respýblikasy Parlamenti Májilisiniń II-shi jáne III-shaqyrylymdarynyń depýtaty Amangeldi Ábdirahmanuly Aitalynyń dúnieden ótýine bailanysty kóńil aitamyn. Amangeldi Ábdirahmanuly uzaq jyldar boiy bilim jáne ǵylym salasynda jemisti jumys jasady. Sonyń ishinde Aqtóbe memlekettik pedagogikalyq institýtynda joǵary bilikti mamandar daiarlaý isine mol eńbek sińirdi. Májilis depýtaty bolǵan kezinde otandyq zańnamany jetildirýge jáne parlamentarizmdi damytýǵa atsalysty. Qajyrly qyzmetimen elimizdiń órkendep damýyna óz úlesin qosyp, sońyna jarqyn iz qaldyrǵan Amangeldi Ábdirahmanulynyń esimi men beinesi umytylmaidy. Marqumnyń imany salamat, jany jánnatta bolsyn», - delingen jedelhatta.
Sonymen qatar qaraly jiynǵa Mańǵystaý oblysynyń ákimi Nurlan Noǵaev, QR Parlamenti Májilisiniń depýtaty Amanǵali Berdalin, kórnekti aqyn, jýrnalist Hanbibi Esenqaraqyzy, Astana memlekettik qyzmet haby basqarýshy komitet tóraǵasy Álihan Baimenov, ýniversitet rektory Laýra Qarabasova, taǵy basqa ziialy qaýym ókilderi, qoǵam qairatkerleri, áriptesteri men jaqyndary qatysty.
Eske salsaq, qoǵam qairatkeri 21 jeltoqsanda 83 jasynda ómirden ótken edi.
