№2 Aqtóbe qalalyq sotynda Zarechnyi politsiia bóliminiń qyzmetkerlerine sot úkimi shyqty. Olarǵa Qylmystyq kodekstiń «Azaptaý» boiynsha aiyp taǵylǵan, dep habarlaidy QazAqparat tilshisi.
Is materialyna súiensek, 2019 jyldyń 25 qańtar kúni saǵat 18:40 pen 22:40 aralyǵynda bir top politsiia qyzmetkeri jábirlenýshi R.Qulmuhambetovty uryp-soǵyp ózi istemegen qylmysty tańyp, moiyndatpaq bolǵan. Basyna polietilen paketin kigizip, psihologiialyq qysym kórsetken, birneshe urlyqty óz moinyna alýǵa kóndirmek nietpen tepkiniń astyna alǵan. Bul is boiynsha Aqtóbe qalasy Almaty aýdandyq №4 politsiia bólimi bastyǵynyń orynbasary Rýslan Esanov pen onyń qolastyndaǵy Marat Temirǵaliev, Dastan Hodjibaev pen politsiia leitenanty Asylbek Talasbaevqa aiyp taǵyldy. Bári úilengen, balalary bar. Olar aiyptaý qorytyndysyn 2019 jyldyń maýsym aiynda aldy.
«Rýslan Esanov Qylmysty kodekstiń 146-baby 1-bóligi 2-tarmaǵy boiynsha aiyp dep tanylyp, 5 jylǵa bas bostandyǵynan aiyrý jazasy taǵaiyndalsyn. Quqyq qorǵaý salasynda 3 jyl jumys isteý quqyǵynan aiyrylsyn. Jazasyn qylmystyq atqarý júiesiniń qaýipsizdigi ortasha mekemesinde ótesin. Politsiia kapitany, «Erligi úshin» medalinen aiyrylsyn», - dedi sýdia Adilova. Sonymen qatar Marat Temirǵaliev politsiia kapitany sheninen aiyrylyp, 5 jylǵa, Dastan Hodjibaev 4 jylǵa, Asylbek Talasbaev 4 jylǵa bas bostandyǵynan aiyryldy. Bári de 3 jyl boiy quqyq qorǵaý salasynda jumys istei almaidy. Buǵan deiin eshqaida ketpeý týraly qolhatpen bostandyqta júrgen politsiia qyzmetkerlerine sot zalynda kisen salyndy.
«Biz mundai bolady dep oilamadyq. Úiden esh alańsyz shyǵyp kettik. Bala-shaǵamyzdy, ata-anamyzdy da ertip kelmedik. Qoǵamnyń nazaryn da aýdarý kerek edi. Bizdiń esh kinámiz joq», - dedi sottalýshy Rýslan Esanov.
Jábirlenýshi Qulmuhambetovtyń moraldyq shyǵyndy óndirý týraly aryzy ishinara qanaǵattandyryldy. Sottalýshylardyń bári 500 myń teńge tóleýi tiis.
