Aqtóbe oblystyq qylmystyq ister jónindegi mamandandyrylǵan aýdanaralyq sotta transulttyq qylmystyq top quramynda aýyr jáne asa aýyr qylmys jasady dep aiyptalýshylar isi boiynsha aldyn ala tyńdaý ótti. Bul týraly aktobenews.kz jazdy.
Qylmystyq is boiynsha Qazaqstan azamaty A.Qojaǵaliev, Belorýssiia azamaty S.Kýntsevich jáne olardyń sybailastary jaýapqa tartylyp otyr. Memlekettik aiyptaýshy sotta 8 qylmystyq oqiǵaǵa bailanysty taǵylǵan aiyptaýlardy tolyq qýattady. Sotqa deiingi tergeý kezinde elimizden syrtqa zańsyz túrde munai tasymaldaýdyń buryn-sońdy bolmaǵan jáne keń kólemdegi qylmystyq oqiǵalary ashylǵan.
Transulttyq qylmystyq toptyń quramynda Qazaqstan, Belorýssiia jáne Qyrǵyzstan azamattary birigip, asa zor kólemdegi zańsyz munai tasymalymen ainalysqan, aitalyq, 2016 jyl ishinde ǵana olar elimizdiń aýmaǵynan jalpy quny 1,5 milliard teńge bolatyn 13 myń tonnadan astam munaidy zańsyz alyp shyqqan. Atalǵan kólemdegi munai 230-dan astam tsisterna-vagonmen tasymaldanǵan.
Aita keteiik, 2016 jyly jeltoqsanda UQK, sybailas jemqorlyqqa qarsy Ulttyq biýro jáne QR Ishki ister ministrligi birigip, bizdiń oblystyń aýmaǵynda zańsyz munai ainalymy boiynsha qylymystardyń jolyn kesý maqsatynda keń kólemdegi arnaiy operatsiialar ótkizgen edi. Operatsiia barysynda «Aqtóbemunaióńdeý» JShS zaýyty aýmaǵynda tintý júrgizildi. Joǵarydaǵy qylmystyq toptyń músheleri osy operatsiia sheńberindegi sharalar qorytyndysynda qamaýǵa alyndy.
