Aǵaiyndy Samat (oń jaqta) pen Sanat Qojaniiazovtar sot zalynda. Aqtóbe, 13 qyrkúiek 2016 jyl
Qazannyń 25-i kúni Aqtóbede qalalyq 2-cot aǵaiyndy Samat pen Sanat Qojaniiazovtardyń "terrorshylar tizimine" qosqany úshin jergilikti politsiia ústinen túsirgen shaǵymyna bailanysty sheshim shyǵardy.
Aqtóbe sotynyń baspasóz ortalyǵynyń habarlaýynsha, azamattyq isti qaraǵan sot Samat Qojaniiazarovtyń aryzyn ishinara qanaǵattandyrǵan. Sot terrorlyq aktige qatysy bolýy múmkin tulǵalar tizimine Samat Qojaniiazovty negizsiz qosqany úshin Qostanai oblysynyń ishki ister departamentinen (IID) 100 myń teńge moraldyq ziian men sot shyǵynyn óndirýge sheshim shyǵarǵan. Sotta ekinshi talapker Sanat Qojaniiazovtyń internette jariialanǵan aqparatqa qatysty talap aryzy boiynsha jaýapkerdiń aqparat taratqany dáleldenbegenin aitty.
Sot aǵaiyndy Qojaniiazovtardyń Aqtóbe oblystyq IID men "Diapazon" gazeti jáne "Rifma" seriktestiginen moraldyq zalal óndirý shaǵymdaryn qanaǵattandyrmaǵan. Qojaniiazovtar ózderin "terrorshylar tizimine kirgizip jibergeni úshin" Aqtóbe oblystyq ishki ister departamentinen 10 million teńge talap etken bolatyn. Jábirlenýshi tarap osyndai somany qate nusqamany jariialaǵan jergilikti gazetten de óndirip alýdy kózdegen.
Aqtóbe oblysy Muǵaljar aýdany Jaǵabulaq aýylynda turatyn Qojaniiazovtar Aqtóbe qalasyndaǵy maýsym aiyndaǵy qarýly shabýyldan soń aty-jónderi men fotosýretterin izdeý jariialanǵan "kúdikti terrorshylar tiziminen" kórip, jergilikti politsiianyń ústine shaǵym túsirgen. WhatsApp messendjeri men áleýmettik jelilerde taralyp ketken nusqamada aǵaiyndy Qojaniiazovtardyń týǵan jyly men aiy, mekenjaiy, aty-jónderi eshbir qatesiz berilgen.
Biyl maýsymnyń 5-inde Aqtóbede 26 adam qarý-jaraq satatyn eki dúkenge shabýyl jasap, ulttyq gvardiianyń áskeri bólimin basyp alýǵa tyrysqan. Shabýyl men atystan resmi málimet boiynsha jeti adam qaza taýyp, 40 shaqty adam jaralanǵan. Alty kúnge sozylǵan arnaiy operatsiia kezinde 18 kúdiktiniń kózi joiylyp, birneshe adam ustalǵan.
Qazaqstan prezidenti Nursultan Nazarbaev shabýyl jasaǵandardyń "radikaldyq dini top ókilderi bolǵanyn" jáne olardyń "shetelden nusqaý alǵanyn" málimdegen.
"Azattyq"
