Aqtóbede bes jýrnalist politsiia departamentine shaqyrylyp, olardan jaýap alyndy. Oblystyq politsiia departamenti baspasóz qyzmetiniń habarlaýynsha, bári kýáger retinde shaqyrylǵan, dep habarlaidy QazAqparat.
Aqtóbe oblysynda alańǵa baryp, jumys istegen jýrnalisterden jaýap alyndy. Bireýiniń úiin tintip, uialy telefony tárkilendi. Oblystyq politsiia departamenti baspasóz qyzmetiniń habarlaýynsha, bári kýáger retinde shaqyrylǵan.
«4 qańtardan bastap oblys ákimdigi aldyndaǵy alańda birneshe kún miting ótti. Qazirgi ýaqytta oblystyq politsiia departamenti jappai tártipsizdiktiń belsendi qatysýshylaryn anyqtaýǵa baǵyttalǵan jedel is-shara júrgizip jatyr. Sonyń ishinde kúdiktilerdi anyqtaý jáne beine jazbanyń bar-joǵyn tekserý, túsinikteme berý úshin keibir jýrnalist kýáger retinde shaqyryldy. Telefondarda saqtalatyn foto jáne beine materialdardy zerdeleý júrgizilýde. Tekserýden keiin bailanys quraldary ielerine qaitarylady.
Vedomstvoaralyq tergeý tobynyń barlyq is-áreketteri tergeý prokýrorymen kelisilgen jáne QIJK normalaryn buzýǵa jol berilmegen. Kórineý jalǵan aqparat taratýǵa jol berilmeitini týraly eskertemiz. Tótenshe jaǵdai kezinde mundai derek anyqtalsa, QR QK 274-babyna sáikes jeti jylǵa deiin bas bostandyǵynan aiyrý jazasy kózdelgen», - dedi oblystyq PD baspasóz qyzmetiniń jetekshisi Erbolat Sarqulov.
Bilik ókilderine qatysty zorlyq-zombylyq kórsetý, ǵimarattarǵa shabýyl jasaý, jappai tártipsizdik uiymdastyrý men terrorizm aktileriniń barlyq faktisi boiynsha oblysta sotqa deiingi 14 tergeý bastaldy. Olardyń ishinde asa aýyr qylmys jasady degen kúdikpen 12 adam ýaqytsha ustaý izoliatoryna qamaldy.
