Sársenbi, 31 tamyzda, Memleket basshysynyń tapsyrmasy boiynsha Premer-Ministr Álihan Smaiylov pen QR Prezidenti Ákimshiliginiń Basshysy Murat Nurtileý Aqtóbe qalasyna kelip, óńirdiń barlyq deńgeidegi máslihat depýtattarynyń jinalysyna qatysty, dep habarlaidy "Ult aqparat" primeminister.kz saityna silteme jasap.
"Úkimet basshysy depýtattarǵa QR Prezidentiniń oblys ákimi qyzmetine Eraly Toǵjanov pen Ashat Shaharovtyń kandidatýralaryn qaraýǵa engizý týraly hatyn oqyp berdi.
Ashyq daýys berý nátijesi boiynsha 160 depýtattyń 104-i Toǵjanovtyń kandidatýrasyna daýys berse, 56-sy Shaharovty tańdady" - delingen habarlamada.
Jinalys aiaqtalǵannan keiin Úkimet basshysy óńir aktivine jańa basshyny tanystyrdy.
Álihan Smaiylov óz sózinde oblys basshylyǵy aldynda Memleket basshysynyń tapsyrmasy boiynsha qabyldanǵan óńirdiń 2025 jylǵa deiingi áleýmettik-ekonomikalyq damýynyń keshendi josparyn sapaly oryndaý mindeti turǵanyn atap ótti.
Premer-Ministrdiń aitýynsha, oblys ekonomikasyn damytýdaǵy negizgi qadamdar jańa investitsiialyq jobalardy iske qosý bolýy tiis, bul turaqty jumys oryndaryn qurýǵa jáne avtojoldardy jańǵyrtýǵa múmkindik beredi.
«Bizdiń basty maqsatymyz – halyqtyń ál-aýqatyn jaqsartý. Osyǵan bailanysty oblys ákimdigi óńirdiń damýyna serpin bere alatyn iri jobalardyń iske asyrylýy men ázirlenýin erekshe baqylaýda ustaýy qajet», — dedi Álihan Smaiylov.
"Úkimet basshysy áleýmettik máselelerdi sheshý, sonyń ishinde aýyz sýmen, elektr energiiasymen qamtamasyz etý, oqýshy oryndarynyń jetispeýshiligin joiý jáne TKSh salasyn jaqsartý da oblys basshylyǵynyń basty nazarynda bolýy tiis ekenin atap ótti.
Sonymen qatar Álihan Smaiylov Aqtóbe oblysynyń áleýmettik-ekonomikalyq damýyna qosqan zor úlesi úshin óńir ákimi qyzmetin atqarǵan Ońdasyn Orazalinge alǵysyn bildirdi" - delingen habarlamada.
