Foto: Facebook/Ermek Imantaev
Aqtóbe oblysynyń eks-ákimi, "Aqtóbe ÁKK" burynǵy tóraǵasy Ermek Imantaevty qamaýda ustaý merzimi uzardy, dep habarlaidy Sputnik Qazaqstan Diapason.kz portalyna silteme jasap.
Ermek Imantaev mamandandyrylǵan tergeý sotynyń qaýlysymen 10 aqpanda 8 sáýirge deiin 2 ai merzimge qamaýǵa alynǵan bolatyn. Oǵan laýazymdyq ókilettigin asyra paidalanyp, jer ýchaskelerin óz baǵasynan tómen satty degen aiyp taǵyldy. Saldarynan memleketke 199,4 mln teńge zalal keltirilgen.
"Bul bap boiynsha, múlki tárkilenip, belgili bir laýazymdardy atqarýǵa ómir boiyna tyiym sala otyryp, 7 jylǵa deiin bas bostandyǵynan aiyrý nemese shekteý jazasy qarastyrylǵan. Sotqa deiingi tergeý jalǵasyp jatyr", - delingen Aqtóbe oblysy boiynsha Sybailas jemqorlyqqa qarsy qyzmettiń baspasóz habarlamasynda.
Ermek Imantaev 2002-2004 jyldary Aqtóbe oblysynyń ákimi boldy, odan keiin QR Prezidenti Ákimshiliginiń memlekettik baqylaý jáne uiymdastyrý jumysy bóliminiń, uiymdastyrý-baqylaý jumysy jáne kadr saiasaty basqarmasy memlekettik inspektsiiasynyń memlekettik inspektory bolyp qyzmet etti.
2010 jyldan bastap Astanada túrli qurylymdarda eńbek etti. 2019 jyldyń qarasha aiynda Ermek Imantaev Aqtóbege oraldy, Aqtóbe ÁKK basshysy bolyp taǵaiyndaldy, onda 2021 jyldyń naýryzyna deiin qyzmet atqarǵan.
