Aqtóbe oblysynyń ákimi Ashat Shaharov Facebook áleýmettik jelisindegi paraqshasynda óńirde qalyptasqan jaǵdai týraly beinejazba jariialady, dep habarlaidy "Ult aqparat".
Ol keltirgen málimetterge qaraǵanda, oblystaǵy 7 respýblikalyq jáne 7 oblystyq mańyzy bar avtojoldar jabyq.
«Apattyq-qutqarý jumystaryna 46 politsiia jasaǵy, tótenshe jaǵdai, áskeri bólimderi men jergilikti atqarýshy organdardan 81 tehnika, 211 jeke quram tartyldy. Oblystyń 8 aýdanynyń ortalyǵynda, iaǵni Qarǵaly, Qobda, Áiteke bi, Alǵa, Muǵaljar, Hromtaý, Baiǵanin, Mártók aýdandarynda 11 jylytý pýnkti ashyldy. Olarǵa 427 adam, onyń ishinde 18 áiel jáne 20 bala ornalastyryldy. 8 avtobýs qar qursaýynan shyǵarylyp, 157 adam, onyń ishinde 17 bala evakýatsiialandy jáne jaqyn jerdegi jylytý pýnktterine jetkizildi. Politsiia trassalardaǵy 50-den astam avtokólikti qutqardy», - degen Ashat Shaharov óńirdegi jaryq berý máselesine toqtalǵan, brigadalardyń túnimen jumys isteitinin atap ótti.
«Oblystaǵy 56 aýyldyń 27-si jaryqqa qosyldy. Ol - 2700 abonent. Aqtóbe qalasynda da jaryq sóndi. Qala jáne aýdandarda jaryq berý jumystary úzdiksiz júrgiziledi», - dep atap ótti oblys ákimi.
Al sýmen qamtý boiynsha «Tómengi Qarǵaly» jáne «Tamdy» toǵandary, sondai-aq qalanyń sý tazartý nysandarynyń jumysy qalpyna keltirilgen.
Beinejazba sońynda óńir basshysy syn saǵatta kúndiz-túni qoldaý kórsetip, joldaǵy azamattarǵa barynsha qol ushyn sozyp jatqan meiirimdi jandarǵa, volonterlarǵa alǵys aityp, barshany oryn alǵan jaǵdailarǵa túsinistik tanytyp, sabyr saqtaýǵa shaqyrǵan.
«Biz árqashan birgemiz. Amandyqta bolaiyq», - dep sózin túiindedi Ashat Shaharov.
