Aqtóbe oblysy ákimi Ońdasyn Orazalin jeke qaýipsizdigin oilap, halyqtyń aldyna shyqpady. Bul týraly ákimniń birinshi orynbasary Rýslan Hambarov aitty, dep habarlaidy Sputnik Qazaqstan agenttigi "Moi gorod" portalyna silteme jasap.
Jýrnalisterge suhbat bergen Hambarov mitingke shyqqan adamdardyń bireýdi kórýge de, tyńdaýǵa da nieti bolmaǵanyn jáne birjaqty talaptar qoiǵanyn jetkizdi. Osy oraida ákim orynbasary Almaty oblysyndaǵy áriptesin eske saldy. Jappai tártipsizdikter kezinde Liazzat Turlashov soqqyǵa jyǵyldy. Qazirgi kezde ol aýrýhanada em-dom alyp jatyr.
"Meniń áriptesim ákimniń orynbasary retinde mitingke shyqqandarmen kezdesken. Aqyry ne boldy? Ony uryp ketti. Endi, aýrýhanada jatyr. Sol jerde bireýdiń sózine qulaq asqan adam bolmady", - deidi Hambarov.
Onyń oiynsha, narazylyq aktsiialary kezinde basqa ákimder alańǵa shyqsa da, bireýi de halyqty toqtata almady.
"Qazir oblys ákimi qashyp ketti nemese orynbasarlary qorqyp shyqpai qaldy degen áńgime shyǵyp jatyr. Biraq bir nárseni eskerý kerek. Birinshiden, ol jerde adamdy eshkim tyńdaǵan joq. Ekinshiden, jeke qaýipsizdik degen másele bar. Meili, shyqty deiik, biraq artynan soqqyǵa jyǵady ǵoi. Sondyqtan bul durys sheshim emes", - dep atap kórsetti ákimniń birinshi orynbasary.
Esterińizge sala keteiik, jańa jyldyń alǵashqy kúnderi Qazaqstannyń batysynda gazdyń baǵasy kúrt kóterilip ketkennen keiin naryzylyq aktsiialary bastaldy, halyq kóshege shyqty. Osydan keiin úkimet otstavkaǵa ketti. Almatyda jáne basqa oblystarda jappai tártipsizdikter bastaldy.
Úkimettiń sheshimimen Mańǵystaý, Aqtóbe men Atyraý oblystarynda gazdyń baǵasy 50 teńgege deiin tómendedi.
