Aqtóbe oblysynyń ákimi brifing ótkizip, tótenshe jaǵdai kezinde qalai jumys istegenin aityp berdi, dep habarlaidy QazAqparat.
Aqtóbe oblysynyń ákimi Ońdasyn Orazalin búgin alǵash ret tilshiler aldynda suraqqa jaýap berdi.
Ol qazir oblystaǵy ahýaldyń turaqtanǵanyn aitty.
«Tirshilikke qajetti barlyq nysan, qoǵamdyq kólikter shtattyq rejimde jumys isteýge kirisip jatyr. Sondai-aq saýda, iri óndiris oryndary jáne qarjy mekemeleri óz jumysyn jandandyrdy. Degenmen qazir koronavirýs infektsiiasynyń úshinshi tolqynynyń órshýine bailanysty jaǵdai kúrdelene tústi. Bir túnde 323 derek tirkeldi. Odan ári kóbeiýi múmkin. Kereýet sanyn kóbeitip, dári-dármek qory jasaqtaý tapsyryldy. Aýrýhana men dárihana da ázirlendi. Jedel járdem jumysy da baqylaýǵa alyndy», - dedi oblys ákimi Ońdasyn Orazalin.
Keiin tilshilerdiń suraǵyna jaýap berip, tótenshe jaǵdai kezinde qalai jumys istegenin, halyq aldyna nege shyqpaǵanyn túsindirdi.
«Qan tógilse, mańdaǵan adam qyrylsa, bári basqasha bolar edi. Meniń bar is-áreketim - sony boldyrmaý. Qolymyzdan kelgenshe tártipke shaqyrdyq, basý aittyq. Qaramaǵymdaǵy qyzmetkerlerge «baryp, túsindirý jumystaryn júrgizińder» dep tapsyrma berdim. Biraq adamdardyń basy qosylmady, dialogqa baratyn bireýi de bolmady. Biren-sarań top keldi. Ártúrli top. Olardyń arasynda destrýktivti dini aǵym ókilderi, Bestamaqtaǵy shoshqa fermasynyń múddesin oilaǵandar kezdesti. Keibiri alańǵa jaǵdaidy kórý úshin kelgen eken. Ekstremistik top músheleri de kezdesti. Tergeý kezinde bári anyqtalady. Eshteńe suraýsyz qalmaidy. Meniń Aqtóbege kelgenime úsh jyl. Men zańsyz jiynǵa bir de bir ret shyqqan joqpyn, túsinikteme bergen de joqpyn. Bul - meniń ustanymym. Zańsyz jinalǵandarǵa barý, olarǵa ýáde berý zańdastyrylǵandai bolar edi. Qaramaǵymdaǵy adamdardy jibergenim ras. Basý aitqandai boldy. Kóbi túsingen joq. Biraz óńirde áriptesterim shyqty. Bir de bireýi bitimge kelgen joq. Qaita balaǵattady, qol jumsaýmen aiaqtaldy», - dedi Ońdasyn Orazalin.
Oblys ákiminiń aitýynsha, qańtardyń 5-nen 6-na qaraǵan túni adamdar ákimdikke kirdi. Al qańtardyń 6-nan 7-ne qaraǵan tańda quqyq qorǵaý organdary arnaiy operatsiia júrgizdi.
«Bilik ǵimaratta emes, bilik ákim bar jerde. Qalanyń ishinde boldym. Orazalin qantógiske jol bermedi degen atpen tarihta qalady. Aqtóbeniń turǵyndaryna rizamyn. Ashýǵa salynǵan joq. Al oblys ákimdiginiń ǵimaratyn jóndep alamyz. Respýblikalyq emes, óz biýdjetimizdiń esebinen jóndeimiz», - dedi Ońdasyn Orazalin.
Sonymen birge tilshilerden jaýap alýǵa qatysty pikirin bildirdi.
«Tek jýrnalister emes, meniń qaramaǵymdaǵy memlekettik qyzmetkerler, qala ákimi Ashat Shaharovqa deiin politsiiaǵa shaqyryldy. Qarapaiym adamdar, ádeii qylmystyq nietpen kelgen adamdardyń bárin elekten ótkizemiz. Álde de jýrnalister kýáger retinde shaqyrylýy múmkin. Oǵan túsinistikpen qarańyzdar. Telefondaryńyzdaǵy videolar da mańyzdy. Dálel, aiǵaq retinde paidalanylady. Bir de bir jýrnalist qamaýǵa alynǵan joq. Eskere ketetin jait, alańda aldyńǵy shette turǵan quqyq qorǵaý organdarynyń qyzmetkerleri de kýáger retinde oqiǵa týraly aitady. Oǵan renjimeńder, bári - quqyq qorǵaý organdarynyń jumysy. Reti kelse kómektesińder, aqparatpen bólisińder. Bizge keregi - eldegi turaqtylyq», - dedi oblys ákimi Ońdasyn Orazalin.
