© Photo: Pixabay / Pexels
QMA Aqtóbe oblysy boiynsha Departamenti zańsyz oiyn biznesin onlain formatta (internet-kazino) uiymdastyrǵan 3 tulǵaǵa qatysty sotqa deiingi tergep-tekserý amaldaryn júrgizip jatyr, dep habarlaidy "Ult aqparat" Qarjylyq monitoring agenttigine silteme jasap.
Uiymdastyrýshylar Qazaqstan aýmaǵynda tyiym salynǵan saittarǵa silteme men birjolǵy login jáne parol berip, oiynshylardan bank qosymshasy arqyly stavkalar qabyldaǵan.
Osylaisha, olar oiynshylarǵa naqty utystar bere otyryp, tiisti litsenziiasyz qumar oiyn túrindegi zańsyz qyzmet kórsetken.
"Aldyn-ala esep boiynsha, zańsyz qyzmetten túsken qarjy ainalymynyń jalpy somasy 490 mln teńgeni qurady. Oiynshylar sany 800 adamnan asady.
Sonymen qatar kámeletke tolmaǵandardy zańsyz oiyn biznesine tartý faktileri tekserilip jatyr.
Júrgizilgen tintý nátijeleri boiynsha zańsyz oiyn qyzmetine qatysty zattar men qujattar, sondai-aq aqshalai qarajat tabylyp, tárkilendi.
Sotqa deiingi tergep-tekserý júrgizilip jatyr. QR QPK-niń 201-babynyń tártibimen tergeý múddesindegi ózge de aqparat jariia etilýge jatpaidy" - delingen habarlamada.
QR Konstitýtsiiasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árkim kinásiz dep esepteledi.
