Aqtóbe oblysynda iri kásiporyndar jumysshylardyń jalaqysyn kótere bastady, dep habarlaidy Sputnik Qazaqstan agenttigi jergilikti Moi gorod portalyna silteme jasap.
Aimaqtaǵy mitingter kezinde iri kásiporyndardyń jumysy toqtap turdy. Sonyń ishinde Aqtóbe mys kompaniiasy, "Qazhrom" men "SPNS-Aqtóbemunaigaz" bar. Narazylyq aktsiialary bastalǵannan keiin arnaiy komissiia qurylǵan bolatyn.
Aqtóbe oblysy ákiminiń orynbasary Rýslan Qambarovtyń aitýynsha, iri kásiporyndar 2-3 kúndei jumys istemei turǵan. Sonyń ózi ekonomikalyq kórsetkishterge birshama áser etti. Jumysshylar joldy japqannan keiin kólik qatynasy men júk tasymaly toqtady.
"Jumys berýshiler men jumysshylar arasyndaǵy daý-damai shekten shyǵyp ketti. Adamdar temir joldy jáne tas joldy jaba bastady. Ondai jaǵdai kásiporyndardyń jumysyna ǵana emes, jalpy, temirjol men kólik qatynasyna keri áser etti. Qalalar arasyndaǵy qatynas toqtap qaldy. Máselen, Samara-Shymkent tas jolynda Hromtaýǵa jaqyn jerde úlken keptelis boldy", - deidi Qambarov.
Budan bólek, mitingke qatysýshylar Aqtóbe - Astrahan, Qarabutaq - Qostanai, Qandyaǵash – Embi tas joldaryn jaýyp tastady. Narazylyq bildirýshi top jalaqyny kóterýdi talap etti.
"Osy aidan bastap 25 myń jumysshynyń jalaqysy ortasha eseppen 25 protsentke ósedi. Aqtóbe mys kompaniiasy, "Kopper Tehnolodji" men "Qazgeorýd" bar, ol jerde, shamamen, eki myń adam isteidi, jalaqy 20 protsentten 50-ge deiin kóteriledi. Aimaqtaǵy iri munai kompaniiasy - "SPNS-Aqtóbemunaigazda" 25 protsentke, al "Qazhromda" jalaqy 10 protsentten 35-ke deiin artady", - dedi ákimniń orynbasary.
Qambarov basqa kompaniialarmen kelissóz júrgizilip jatqanyn da jetkizdi.
