Aqtóbe oblysy aýmaǵynda shalǵyn kóbelek qaptap ketti. Turǵyndar túnde jaryqqa úimelep, kúndiz úige kirip jatqanyn aityp, kómek surady, dep habarlaidy "Ult aqparat".
Shilde aiynda Aqtóbede sharýalar men bosalqy jerdi, aýyl ishin qurt jailasa, qazir ósip kóbelekke ainaldy.
«Qazaqstan aimaǵynda shalǵyn kóbelektiń kóbeiýi eki urpaqqa, elimizdiń batys óńirinde, onyń ishinde Aqtóbede úsh urpaqqa deiin jalǵasýy múmkin. Jalpy bul ziiankestiń jappai taralýy 8-10 jylda baiqalyp tur. Shalǵyn kóbelektiń adamdar men ósimdikke esh ziiany joq. Tek juldyzqurty ziiandy. Respýblikalyq fitosanitariialyq diagnostika jáne boljamdar ádistemelik ortalyǵynyń málimeti boiynsha, 7 tamyzdan bastap Aqtóbe qalasy, Muǵaljar Qobda, Alǵa, Mártók, Qarǵaly, Hromtaý aýdandarynda shalǵyn kóbelektiń jappai ushýy baiqalyp otyr. Endi tamyz aiynyń aiaǵy nemese qyrkúiekte qaita juldyzqurt shyǵýy múmkin. Sondyqtan jeke kásipkerler, adamdardyń ózderi monitoring jasap, qurt kezinde ýlaýy kerek», - dedi Aqtóbe oblystyq aýyl sharýashylyǵy basqarmasy basshysynyń orynbasary Asylhan Ábtiev.
Aqtóbede oblysy boiynsha 38 myń gektar jerdi sharýalar, al 1800 gektar jer demeýshiler qarjysymen óńdeldi.
«Shalǵyn kóbelektiń qurty ǵana qaýipti. Qazir kóbelek 3-7 kún boiy ushady. Keiin jumyrtqa salady. Jumyrtqanyń damý kezeńi 3-10 kún aralyǵynda. Keiin ǵana juldyz qurty shyǵady. Juldyzqurttyń damýy 1-4 apta aralyǵynda. Bul da aýa raiyna bailanysty. Ylǵaldy, jańbyrly bolsa damidy, al ystyqta óledi», - dedi «Respýblikalyq fitosanitariialyq diagnostika jáne boljamlar ádistemelik ortalyǵy» RMM basshysy Ǵarifýlla Jolaev.
