Ústirtte kiik aýlap júrip, kóligin órtegen brakonerler sot sanktsiiasymen 2 aiǵa qamaldy. Bul týraly Azattyqqa Aqtóbe oblystyq politsiia departamentiniń baspasóz qyzmeti habarlady.
Politsiianyń málimetinshe, 1974 jyly jáne 1975 jyly týǵan Qyzylorda oblysynyń eki turǵyny 7 jeltoqsan kúni sot sanktsiiasymen Aqtóbe oblysy Shalqar aýdanyndaǵy ýaqytsha izoliatorǵa qamalǵan. Politsiia "kiikti zańsyz aýlaǵandar taǵylǵan aiypty moiyndady" dep habarlady.
Kúdiktilerdi qamaýǵa sanktsiia berilgenin Aqtóbe oblystyq soty rastady. Sot málimetinshe, kúdiktiler Saǵynbazar Ibraiymov pen Qurmanǵali Beribaevqa Qylmystyq kodekstiń 337 baby 3-bóliginiń 1-shi, 3-shi tarmaqtary boiynsha aiyp taǵylǵan. Sot olardy 2020 jylǵy 5 aqpanǵa deiin qamaýǵa alýǵa sanktsiia bergen.
Kúdiktiler mingen Toyota Land Cruiser 100 avtokóligin 5 jeltoqsan kúni Aqtóbe oblysynyń Shalqar aýdanyndaǵy tekseris kezinde "Ohotzooprom" kásiporny Aqtóbe bólimshesiniń inspektorlary baiqaǵan. Politsiia brakonerler qylmysyn jasyrý maqsatynda kólikterin ózderi órtep jibergenin aitady.
Kóligin órtegen brakonerler jaily qysqa videolar áleýmettik jelilerge taraǵan edi. Videoda Toyota Land Cruiser 100 avtokóliginiń órtengeni kórinedi jáne onyń iesiniń "moiyndaý sózderi" estiledi.
Politsiianyń habarlaýynsha, órtengen kólik salonynan kiiktiń eki laǵynyń súiegi, 14 múiiz, bir ara, úsh pyshaq pen oq - dári, 12 - kalibrli eki ańshy myltyǵy tabylǵan.
Kiikter Qazaqstanda memleket qorǵaýyna alynǵan. Brakonerler kiik aýlap, múiizin saýdalaidy. Qazaqstanda bir ǵasyrǵa jýyq ýaqyt ishinde kiik birneshe ret kúrt azaiyp, qaita kóbeigen. 2015 jyly Qazaqstanda belgisiz indet saldarynan birneshe aptada 150 myńnan asa kiik qyrylǵan.
Qazaqstan biligi 2020 jylǵa deiin kiik aýlaýǵa shekteý qoiǵan.Biyl zańsyz kiik atqandardy ustamaq bolǵan "Ohotzooprom" mekemesiniń eki inspektory brakonerler qolynan qaza bolǵan.
