Aqtóbede úsh adam sýǵa túsip, batyp ketti. Onyń ekeýi mas bolǵan, dep habarlaidy "Ult aqparat".
Aqtóbede sýǵa túsý maýsymy bastalǵan joq. Eskertýge qaramastan belgilenbegen jerde sýǵa túsken adamdar jaǵaǵa qaita shyqpai qalǵan.
«Birinshi jaǵdai Qobda aýdanynyń Qobda ózeninde tirkeldi. 1996 jyly týǵan azamat mas kúiinde sýǵa túsip, batyp ketken. Qutqarýshylardyń kúshimen azamattyń denesi 4 metr tereńdikten jaǵaǵa shyǵaryldy. Al 8 mamyr kúni Aqtóbe qalasyndaǵy Jińishke ózeninde belgisiz adamnyń denesi tabylǵany týraly habarlama kelip tústi. Oqiǵa ornyna qutqarýshylar jedel túrde jiberilip, ózen jaǵasynan 2 metr qashyqtyqta jáne 1 metr tereńdikten 1944 jyly týǵan áieldiń denesi sýdan shyǵaryldy. Aita ketý kerek qaza bolǵan azamatsha syrt kiimin sheshpegen. Oqiǵanyń mán-jaiyn anyqtaý úshin politsiia qyzmetkerleri tergeý júrgizip jatyr», - dep habarlady oblystyq TJD baspasóz qyzmeti.
Sonymen birge 9 mamyr kúni Hromtaý aýdanyndaǵy Oisylqara ózeninde qaiǵyly jaǵdai tirkeldi.
Aýdandyq politsiia bóliminiń málimetine sáikes, 1960 jyly týǵan azamat joldastarymen balyq aýlaýǵa baryp, mas kúiinde syrt kiimmen sýǵa túsip ketken.
61 jastaǵy azamattyń denesi qasynda bolǵan kýágerlerdiń kúshimen jaǵaǵa shyǵarylǵan.
Aqtóbe oblystyq TJD qyzmetkerleriniń aitýynsha, turǵyndar qutqarýshylardyń eskertýin elemeidi jáne saldary jaily oilamastan jabdyqtalmaǵan jáne qaýipti jerde shomylýyn jalǵastyryp jatyr.
