Foto: Tengrinews.kz/Turar Qazanǵapov
Aqtóbe oblysy Shalqar aýdany Qaratoǵai aýylynda 5-synyptyń oqýshysyn aýdandyq bilim bólimi basshysynyń muǵalim áieli urǵan, dep habarlaidy Sputnik Qazaqstan.
Oqiǵa 3 sáýirde bolǵan. Qaratoǵai aýylynyń 10 jastaǵy oqýshysy Nursaiat Muratov eki birdei pedagogtan zábir kórgen. Onyń biri - mekteptiń tárbie meńgerýshisi. Nursaiattyń ákesi Dáýirbai Myrzaǵarynyń aitýynsha, balasynyń aiyby – 10-synyp oqýshysyna vatsap arqyly dóreki sózder jazǵany.
"Mektepke shaqyryp, balanyń tártipsizdigin aitty. Balamdy kabinetke súirep ákeldi. Men oǵan renjip turǵanym joq. Sol jerde muǵalimderden balamnyń qylyǵy úshin keshirim suradym da, ketip qaldym. Biraq men ulymdy muǵalimniń urǵanyn bilgen joqpyn. Ertesi kúni meni politsiia balammen qosyp shaqyrdy. Men maldan shyǵa almaitynymdy aityp barmadym. Ata-ana quqynan aiyrady dep birnárse aitty. Sóitsem, jańaǵy balamdy urǵan muǵalim Gúlzat Súleimenova politsiiaǵa baryp, balamnyń ústinen aryz jazypty", - deidi Dáýirbai Myrzaǵary.
Shalqar aýdandyq politsiia bólimi pedagog Gúlzat Súleimenovadan 5-shi synyp oqýshysynyń ústinen shaǵym túsirgenin rastady.
"4 sáýirde Gúlzat Súleimenova politsiia shaqyrtty. Shaqyrtý túsken soń barýǵa mindettimiz. Súleimenova "Nursaiat Muratov balaǵat sóz aitty" dep shaǵym jazdy. Biz Nursaiattyń ákesi Dáribai Myrzaǵaryny shaqyrdyq, ol kisi maldan shyǵa almaitynyn aityp basynda kelmegen, sosyn keldi. Biz balanyń ákesinen jaýap aldyq. Muǵalimge qarsy shaǵym jazýǵa bolatynyn aittyq. Biraq Dáýirbai Myrzaǵary muǵalimniń ústinen aryz jazýdan bas tartty. Biz bul isti aýdan ákimi janyndaǵy komissiiaǵa jiberemiz. Ary qarai solar sheshedi", - deidi Shalqar aýdany PB bastyǵynyń birinshi orynbasary Aibek Borashev.
Eshnárseden habary joq áke áý basta balasyn aýdandyq aýrýhanaǵa ákelgen. Óitkeni bala eki kún boiy túnimen uiyqtamai, shoshyp shyqqan.
"Bala sońǵy eki kúnde uiyqtap jatyp shoshyp, ornynan tún ishinde turyp júrip kete berdi. Sosyn aýdanǵa dárigerge ákeldim. Psiholog bala qatty shoshynǵan deidi. Balamdy urǵanyn men bilmeppin. Ony maǵan aýdan emhanasyndaǵy psiholog aitty. Mektepte oqýshylarmen tóbelesip qalǵan shyǵar dedim. Sóitsem, muǵalim urǵan. Balam vatsap arqyly 10-shy synyptaǵy oqýshy ulǵa qyz bolyp dóreki sóz jazypty. Ony maǵan kórsetti. Ol qyzdyń anasy mektepte muǵalim bolyp isteitin Gúlzat Súleimenova degen kisi. Onymen birge tárbie meńgerýshisi bolǵan. Tárbie meńgerýshisi kúshtep balaǵa túsinik jazdyrǵan, al ana muǵalim urǵan", - deidi jábirlenýshiniń ákesi Dáýirbai Myrzaǵary.
Bala muǵalimniń urǵanyn ákesine aitpaǵan, biraq psihologqa bastan aiaq bolǵan oqiǵany baiandap bergen.
"Balada qorqynysh bar. Bala aitady "Aisultan degen balanyń ápkesi bolyp, oqýshy ulǵa SMS jazdym, prank jasaǵym keldi" deidi. Ana ul kim jazǵanyn izdep taýyp alǵan. "Altynshy klastyń Aisultan degen balasy ápkemniń atynan nege olai jazasyń dep tiisti" deidi. Aisultan men Nursaiat eregesip qalǵan. Aisultan muǵalim mamasyna aityp barǵan. Sosyn Nursaiat aitady "Gúlzat apai meni bólmege kirgizip, nuqyp urdy" deidi. Psiholog retinde aitarym, balada úlken úrei bar. Onymen qoimai balany politsiiaǵa aparyp jatyr. Ary qarai jaǵdaiy ne bolady sonda?" - deidi Shalqar aýdandyq emhanasynyń psihology Úmit Elekbaeva.
Al muǵalimder qyzmet etetin Qaratoǵai aýyldyq mektebiniń direktory Ábdiǵali Qaiýpovtyń aitýynsha, aýdandyq aýrýhana psihology da, balanyń ákesi de ótirik aityp, jala jaýyp otyr.
"5-synyp oqityn Nursaiat esimdi bala Gúlzat Súleimenova degen muǵalimniń oqýshy qyzynyń atynan jigitke "súiisesiń be" dep jazǵan, odan da basqa dóreki sózder jazǵan. Oqýshy qyzdyń inisi Aisultan Nursaiatqa "nege sen meniń ápkem bolyp jazasyń" dep ustasyp qalǵan. Muǵalimder olardy arashalaǵan. Balanyń ákesi Dáýirbai muǵalimderge jala jaýyp otyr. Gúlzat Súleimenovanyń 10 jyldyq, al tárbie meńgerýshisi Meiramgúl Eleýkenovanyń 32 jyldyq tájiribesi bar. Mundai keleńsizdikti olar jasamaidy. Balaǵa óz erkimen túsinik jazdyrǵan. Aýrýhananyń psihologtary ótirik aityp otyr. Oqýshy sms jazǵanymen qoimai muǵalimdi boqtaǵan. Kabinetke eki jaqtyń ata-anasyn shaqyryp, sóileskenimizde oqýshy sheshesinen boqtap tur", - deidi Qaratoǵai aýyldyq orta mektebi Ábdiǵali Qaiýpov.
Nursaiat atynan jazǵan 10-shy synyptyń oqýshy qyzy da, Aisultan da mektep muǵalimi Gúlzat Súleimenovanyń balasy. Al balany urdy degen kúdikke ilingen pedagog Gúlzat Súleimenova aýdandyq bilim bóliminiń basshysy Qaziz Jumahanovtyń áieli. Bul jaǵdai týraly Qaziz Jumahanovtyń ózinen de surap kórdik.
"Ol jaǵdai boiynsha kommentarii bermeimin. Mektepte bolǵan muǵalimder bersin. Meniń qyzymnyń atynan aýzyna kelgenin jazǵan. Sonda oqýshy solai jaza berýi kerek pe? Men ol sózderdi oqi almaimyn. Quqyq qorǵaý organdary bul máseleni sheshsin", - deidi aýdandyq bilim bóliminiń basshysy Qaziz Jumahanov.
Bilim bóliminiń basshysynan 10 jastaǵy bala jazǵan habarlamany surap kórip edik, ol kórsetýden bas tartty. Qazirgi kúni muǵalimder bala boqtady dep kýáger jinap, qolhat jazdyryp alyp jatqan kórinedi. Al aýdandyq dárigerler balanyń ákesine oblystyq aýrýhanaǵa joldama bergen. Mektep direktory bolsa, Dáýirbai Myrzaǵarydan "aryz jazǵan muǵalimnen keshirim suraýdy" talap etip otyr. Qaratoǵaidaǵy muǵalimder men 5-shi synyp oqýshysy arasyndaǵy janjal bitken joq.
