Foto ©️ Tengrinews.kz / Turar Qazanǵapov
Aqtóbe oblysy Alǵa aýdandyq bilim bóliminiń basshysy qyzmettik ókilettiligin asyra paidalanyp, kásippen ainalysqany úshin sottaldy. Oǵan 3 jyl 6 ai bas bostandyǵynan shekteý túrindegi jaza kesildi, - dep habarlaidy Tengrinews.kz saity.
Alǵa aýdandyq soty Qylmystyq kodekstiń laýazymdyq ókilettiligin teris paidalaný, qyzmettik jalǵandyq jasaý jáne kásipkerlik qyzmetke zańsyz qatysý baptary boiynsha aýdandyq bilim bóliminiń basshysyna qatysty isti qarady.
Is materialyna súiensek, Alǵa aýdandyq bilim bóliminiń basshysy oqý ortalyǵyn ashqan. Jumysyn júrgizý úshin tanysyna tiesili jeke kásipkerdiń atyn paidalanady. Sóitip, balalarǵa qosymsha bilim berý qyzmetin kórsetý úshin konkýrsqa túsip, 1,2 million teńge utady.
Sonymen qatar, jaz aiaqtalar tusta jetim, ata-anasynyń qamqorlyǵynsyz qalǵan, turmysy tómen, kópbalaly otbasynan shyqqan, múgedektigi bar 300 balany 12 kúndik lagerge jiberýdi josparlaidy. Joldama satyp alýǵa 18 850 000 teńge bólingen. Ýaqyt tyǵyz, qarjyny igerýge úlgermeitinin bilse de, sottalýshy memlekettik satyp alýdy ótkizý týraly sheshim qabyldaidy. Nátijesinde konkýrs sharttary ózgertilip, lagerge 12 kúnge emes, 7 kúnge jiberilgen. Lagerge barǵan 203 balanyń 160-y arnaiy sanatqa jatpaityny da anyqtaldy. Al, qujat boiynsha 300 bala 12 kúndik demalysta bolǵany jazylǵan.
"Sottalýshynyń zańsyz áreketteriniń nátijesinde bilim bólimi seriktestik shotyna 10 280 674 teńge somasynda biýdjet qarajatyn negizsiz aýdardy. Qylmystyq is Aqtóbe oblysy prokýrorynyń orynbasary men sottalýshy arasynda jasalǵan kináni moiyndaý týraly protsestik kelisimmen sotqa kelip tústi. Sottalýshy sot otyrysynda protsestik kelisimniń mazmunyn qoldap, belgilengen jazamen de kelisetinin málimdedi", - delingen habarlamada.
Prokýror protsestik kelisimde sottalýshynyń shyn ókingenin, kináni moiyndaǵanyn jáne zalaldy erikti túrde ótegenin eskerip, jazany óteýdiń búkil merzimi ishinde jyl saiyn 100 saǵattan májbúrli eńbekke tarta otyryp, 3 jyl 6 ai merzimge bas bostandyǵyn shekteý túrindegi jaza taǵaiyndaý týraly ótinish bildirdi.
Sondai-aq, memlekettik qyzmette laýazymdardy atqarý quqyǵynan ómir boiyna aiyrý túrinde qosymsha jaza taǵaiyndaýdy surady. Sot kórsetilgen jazany taǵaiyndai otyra, protsestik kelisimdi bekitti. Sot tarapynan Aqtóbe oblystyq bilim basqarmasynyń basshylyǵyna jeke qaýly shyǵaryldy. Sot úkimi zańdy kúshine engen joq.
