Aqtóbe oblysyna 5,8 trln teńge investitsiia tartylady. Bul týraly búgin Úkimet otyrysynda Aqtóbe oblysynyń ákimi Ońdasyn Orazalin aitty, dep habarlaidy QazAqparat.
«Aqtóbe oblysynyń 2021-2025 jyldarǵa arnalǵan áleýmettik-ekonomikikalyq damý keshendi jospary óńirdiń órkendeýine jańa serpin berip, shikizatqa táýeldilikti tómendetý, sondai-aq halyqtyń ál-aýqatyn jaqsartý maqsatynda ázirlendi. 5 jyldyń ishinde keshendi jospar jobalaryn iske asyrýǵa barlyǵy 570 mlrd teńgege jýyq qarajat qarastyrylsa, onyń basym bóligi óndiris jáne aýyl sharýashylyǵy kásiporyndarynyń esebinen bolady. Búginde Aqtóbe oblysynyń geografiialyq jaǵynan tiimdi ornalasýy, jer qoinaýynda bai ken oryndarynyń jáne adami kapital áleýetiniń mol bolýy óńirge investorlardyń qyzyǵýshylyǵyn týdyryp otyr. Aqtóbe oblysynyń óndirisi damyǵan iri óńir ekendigin eskere otyra, keshendi josparda jeke investorlar esebinen júzege asyrylatyn birneshe joba kózdelgen. Onyń ishinde túrik investorlarymen iske asyrylyp jatqan, erekshe sharttary bar indýstriia aimaǵyn qurý jobasy bar. Jalpy osy joba aiaqtalǵan soń 20 myńnan astam jumys orny qurylyp, 500 mlrd teńge investitsiia tartylady», - dedi Ońdasyn Orazalin.
Oblys basshysynyń dereginshe, jalpy 2025 jylǵa deiin óńirge 5,8 trln teńgeden astam investitsiia tartylady. Onyń 1,7 trln teńgesi sheteldik investorlardyń qarajaty bolady.
«Óńirde kóptegen infraqurylymdyq jobalar da iske asyrylyp jatyr. Onyń ishinde keshendi josparǵa sáikes 2025 jylǵa deiin respýblikalyq biýdjetten 65 mlrd teńgege jýyq qarajat qoldaý tapty. Buǵan qosa, jergilikti biýdjetten qosymsha qarjyldandyrý esebinen birneshe avtomobil jolyn qaita jańǵyrtý, jeke turǵyn úi qurylysy alańdaryn injenerlik-kommýnikatsiialyq jelilerimen qamtý jobalary iske asyrylady», - dedi óńir ákimi.
