Búgin Aqtóbe oblysynda «Shyǵys munai jáne servistik qyzmet» JShS-nyń jumysshylary jalaqyny kóterýdi surap, kompaniia basshylyǵymen kezdesti, dep habarlaidy "Ult aqparat".
JShS-da 1 myńnan astam jumysshy bar. Óńirdegi munai óndiretin kásiporyndarǵa tehnikalyq qyzmet kórsetetin kompaniianyń jumysshylary buǵan deiin de basshylarymen kezdesip, jalaqy kóterý máselesin qozǵaǵan edi. 2019 jyldyń qańtar aiynda eńbekaqy – 9 paiyzǵa, qyrkúiekte 20 paiyzǵa ósken. Al jumysshylar ony 50 paiyzǵa deiin kóterýdi surap otyr.
«Ózge tehnikalyq qyzmet kórsetý kompaniialarymen salystyrǵanda bizde jalaqy az. Buǵan deiin ony 50 paiyzǵa kóterý máselesi qozǵaldy. Óz jalaqym – 170 myń teńge. Sanaty tómen adamdar 90 myń teńge alady. Burǵylaý kompaniiasy úshin – bul uiat. Jumysy aýyr, tabysy az», - dedi burǵylaýshy Amantai Berdimaǵambetov.
Jumysshylardyń barlyǵy bir ǵana – jalaqy máselesin qozǵady.
«Jumys berýshi 20 paiyzdan artyq jalaqyny kótere almaityndaryn aitty. Biz – kelispeimiz. Búgin bas keńsege jinalyp, óz talabymyzdy aityp jatyrmyz. Jumys 14 qazanda aiaqtalýy tiis edi, birneshe brigada jumysshysyn ákimshilik demalys dep keri qaitaryp jiberdi. Endi jumystyń qai ýaqytta qaita jandanatynyn bilmeimiz», - dedi burǵylaýshynyń birinshi kómekshisi Rýslan Shoqparov.
Kompaniia ujymy jinalǵan jerge oblys ákiminiń orynbasary Qairat Bekenov kelip, kezdesý ótkizdi.
«Sońǵy jyldary bul kompaniia jalaqyny múlde kótermedi. Tek biyl 29 paiyzdyq ósim tirkeldi. Jumystyń ýaqytsha toqtaǵanyna jumysshylar óz narazylyqtaryn bildirdi. Bul, servistik mekeme bolǵan soń, tabys ta sol baǵytqa bailanysty ózgeredi. Tabys az bolsa, jalaqy da tómen. Kompaniia shyǵyny asyp ketkenine qaramastan jalaqy kóterýge kelisti. Buryn 110 myń teńge alǵan jumysshy qazir 146 myń teńge jalaqysyn aldy. Keibirine 250 myń teńgege jetti. Eńbekaqy kóterý isi toqtamaidy – jalǵasady», - dedi Qairat Bekenov.
Sondai-aq ol kompaniiadaǵy jalaqy aiyrmashylyǵy týraly aitty.
«Jergilikti jáne sheteldik jumysshylar jalaqysynyń arasyndaǵy aiyrmashylyqqa bailanysty tekseris boldy. Zańǵa sáikes aiyppul salynyp, talaptar qoiyldy. Máselege prokýratýra jaýap bere alady», - dedi oblys basshysynyń orynbasary.
Aqtóbe oblystyq Eńbek inspektsiiasy basqarmasynyń basshysy Salamat Amanbaevtyń aitýynsha, jumysshylardan aryz tústi, aldaǵy ýaqytta tekserý júredi.
«Bul kompaniiada 106 shetel azamaty jumys istep jatyr. Keler jyly olardyń qataryn azaitamyz. Eń tómengi – tórtinshi sanattaǵy jumysshylar joqtyń qasy», - dedi S.Amanbaev.
Óz kezeginde «Shyǵys munai jáne servistik qyzmet» JShS direktory Chjan Baotsziýn jumysshylardyń talabyn oryndy dep sanaidy.
«Shyǵys munai jáne servistik qyzmet» JShS-nyń basshylyǵy jumysshylardyń talaby oryndy dep sanaidy. Tek ekonomikalyq qiyndyqtarǵa bailanysty qazir bul múmkin emes. Kompaniia basshylyǵy «eki jylda óńirdegi servistik mekemeler ishinde jalaqysy eń joǵary bolady» degen ýáde berip otyr.
