28 mamyr kúni Aqtóbe hrom qosyndylary zaýytyndaǵy jumys barysynda tórt jumysshy qaza taýyp, ekeýi aýrýhanaǵa tústi. Aýrýhanada jatqan eki jumysshynyń jaǵdaiy óte aýyr. Bul týraly Aqtóbe oblystyq densaýlyq saqtaý basqarmasy men eńbek inspektsiiasy habarlady.
Oqys oqiǵa tús aýa hrom qosyndylary zaýytynyń №4 tsehynda bolǵan.
Oblystyq eńbek inspektsiiasy basshysynyń orynbasary Baýyrjan Orazaevtyń Azattyqqa aitýynsha, óndiriste qoldanylatyn baktyń ishindegi himiialyq qaldyqty tazalap jatqanda bir jumysshy kúiip qalǵan. Ony qutqarmaq bolyp, bes jumysshy bakqa túsken. Barlyǵy termiialyq kúiik alǵan. Tórteý qaza bolyp, ekeýi aýrýhanaǵa jatqyzyldy.
Aýrýhanada jatqan eki jumysshynyń da beti, moiny men qol-aiaǵy kúigen. Tynys alý joldary búlinip, kúiikten shok alǵan. Aýrýhanaǵa óte aýyr halde jatqan jumysshylardyń biri – 32 jasta, endi biri – 36 jasta.
Aqtóbe oblystyq politsiia departamentine habar jergilikti ýaqytpen saǵat 13:20-da túsken.
«Jumysshylar tańerteń 50 tekshe metr bolatyn bakti tazartqan. Keiin bireýi aqaýdy kórip, ishine kiredi. Shyqpaǵan soń taǵy úsheýi túsken. Tórteýi oqiǵa ornynda kóz jumdy. Eki adam jedel járdem aýrýhanasyna jetkizildi. Atalǵan fakti boiynsha oblystyq politsiia departamenti Qylmystyq kodekstiń «Abaisyzda eki jáne odan da kóp adamnyń ólimine ákep soqqan qaýipsizdik tehnikasyn buzý» baby boiynsha tergeý bastaldy. Istiń mán-jaiy anyqtalýda», - dedi oblystyq Politsiia departamentiniń basshysy Atyǵai Arystanov.
Hrom qosyndylaryn – natrii monohromaty, natrii bihromaty, hrom angidridi, hrom totyǵy, hrom malmasy jáne kúkirtti natrii – óndiretin zaýyt Aqtóbe qalasy aýmaǵynda ornalasqan. Ol - ónimi álemniń otyzdan astam eline shyǵarylatyn úlken kásiporyn.
