Búgin Aqtóbe oblysynyń ákimi Ońdasyn Orazalin «Aqtóbe» fýtbol komandasynyń jańa quramymen tanysty, dep habarlaidy "Ult aqparat" oblys ákiminiń baspasóz qyzmetine silteme jasap.
Kezdesýge oblystyq dene shynyqtyrý jáne sport basqarmasynyń basshysy Evgenii Goncharov, «Aqtóbe» FK basqarma tóraǵasy Artýr Smaǵulov, bas jattyqtyrýshy Aleksei Petrýshin qatysty.
«Jergilikti fýtboldy damytýǵa qarjylai qoldaý bildirgen depýtattarǵa alǵys bildiremiz. Jańa quram aqtóbelik jankúierlerdiń úmitin aqtaidy dep senemin. Aldaǵy ýaqytta oiyndaryńyz jeńisti ári jemisti bolsyn dep tileimin», — dep atap ótti oblys ákimi Ońdasyn Orazalin.
Artýr Smaǵulov jańa qurammen tanystyrdy. «Aqtóbe» komandasynyń namysyn jergilikti oiynshylardan ózge, Reseiden kelgen Artýr Shabikeev, Edýard Sýhanov, Oleg Chernyshev, Georgii Býrnash, Aleksei Kontsedalov, Andrei Chasovskihter qorǵaityn bolady. Serbiia elinen legioner Nikola Tsýtskich, Kot-d’Ivýár respýblikasynan Kýadja Kýassi, Chernogoriiadan Djordjevich Boban keldi. Komanda kapitany Vitalii Volkov qoldaýy úshin oblys ákimine jáne klýb basshylyǵyna alǵys bildirdi.
«Klýbtyń namysyn qoldan bermeý úshin barymyzdy salamyz jáne bizge artylǵan senimdi aqtaimyz», - dedi Vitalii Volkov.
