«Aqtóbe» FK satylymǵa shyǵaryldy. Fýtbol klýby 7 jylǵa senimgerlik basqarýǵa beriledi. Bul týraly QR Qarjy ministrligi Memlekettik múlik jáne jekeshelendirý komitetiniń saity habarlaidy.
QR Qarjy ministrligi Memlekettik múlik jáne jekeshelendirý komitetiniń resmi saiyndaǵy málimetke súiensek, «Aqtóbe» fýtbol klýbyn satyp alýdy qalaǵan adam 15 million teńge alǵashqy jarna tóleýi tiis. Klýbtyń jalpy quny - 100 million teńge. Al qujattar 9 qazanǵa deiin qabyldanady. Konkýrstyń óz sharttary bar. Senimgerlik basqarýǵa alǵan adam «Aqtóbe» FK bas direktory men bas bapkerin quryltaishymen aqyldasyp, kelisip taǵaiyndaidy. Ári jyljymaityn, jyljymaly múlikterdi satyp, jalǵa berip, kepilge qoiýǵa bolmaidy. Quryltaishy árbir 6 ai saiyn klýbtyń jaǵdaiy týraly esep alady.
«Premer-Liganyń klýbtaryna qoiylatyn reglamentterge sáikes klýbtyń barlyq qajetti jarystar men saiystarǵa qatysýyn qamtamasyz etý (QR Chempionaty, QR Kýbogynyń oiyndary, Premer-Liga klýbtarynyń qosalqy quramdary týrniri, PFL Kýbogy, Premer-Liga klýbtarynyń jasóspirimder men jastar komandalary, birinshi Liga jáne mini fýtbol komandasy arasyndaǵy QR birinshiligi) sonymen qatar, ÝEFA saiystaryna qatysý týraly quqyǵyn alǵan jaǵdaida jarysqa barý mindetteledi. Qazirgi kadrdyń 75 paiyzyn saqtap, ǵimaratqa jóndeý jumystaryn júrgizý qajet. Kreditorlyq bereshekterin óteý, kreditorlyq jáne debitorlyq bereshektiń negizsiz qalyptasýyna jol bermeý, nysandy kreditorlyq jáne debitorlyq bereshekterimen qabyldaý, balalar, onyń ishinde Aqtóbe oblysynyń aýdandarynda balalar fýtbolyn damytý talaby qoiyldy», - dep jazylǵan saitta.
Buǵan deiin habarlaǵanymyzdai, bas direktor Samat Smaqov fýtbol klýbynyń qarjylyq jaǵdaiy kún saiyn qiyndaǵanyn málim etken edi.
