Aqtóbede suiytylǵan gazdyń litri 60-75 teńgege satylyp jatyr. Kóbi talonmen satýǵa kóshti, dep habarlaidy QazAqparat.
Aqtóbe oblysy ai saiyn 13 myń tonna suiytylǵan gaz paidalanady. Al QR Energetika ministrligi qazan aiynda 11 160 tonna suiytylǵan otyn bólýdi josparlady. Aqtóbe oblysynyń turǵyn úi-kommýnaldyq sharýashylyǵy jáne energetika basqarmasynyń gazben jabdyqtaý bóliminiń basshysy Samat Lepesovtyń aitýynsha, onyń 3 924 tonnasy elektrondy saýda alańdarynan tys (35%) jáne 7 236 tonnasy elektrondy saýda alańy arqyly (65%) satyldy.
«Elektrondy saýda alańdarynan tys jerkizý kezinde shekti baǵa bekitilgen. Tonnasyna 38 701,67 teńgeni quraidy. Al elektrondy saýda alańy arqyly satylǵanda baǵa ártúrli. Orta eseppen shildede tonnasyna 67 082, tamyzda 69 808, qyrkúiekte 84 365 jáne qazanda 82 000 myń teńge boldy. Búgingi tańda zaýyttardan 958 tonna suiytylǵan munai gazy jóneltildi. Alaida temirjol arqyly jóneltiletin júktiń kólemi artyp, osy aidyń basynda «Qazaqstan temir joly» AQ stantsiialarynda tsisternalardy jóneltý keshiktirildi. Búgingi tańda Aqtóbe qalasyna 25 vagon tsisterna nemese 900 tonna júk kelip tústi. Gaz toltyrý stansalaryna jóneltý jumystary júrgizilip jatyr. Budan basqa 16 vagon tsisterna nemese 576 tonna Jem jáne Qandyaǵash stansalarynda tur», - dedi Aqtóbe oblysynyń turǵyn úi-kommýnaldyq sharýashylyǵy jáne energetika basqarmasynyń gazben jabdyqtaý bóliminiń basshysy Samat Lepesov.
