Birneshe kún buryn jelide Aqtóbe aýrýhanasyna jetkizilgen naýqastardy qabyldamai jatqan video taraǵan edi. Búgin oblys ákiminiń orynbasary Nurjaýǵan Qalaýov osy iske qatysty túsinikteme berdi, dep habarlaidy Baq.kz agenttigi.
Onyń aitýynsha, Aqtóbe oblysynda koronavirýs juqtyrǵan naýqastardy qabyldaityn oryn jetkilikti. Dárigerler naýqastardy qabyldaý boiynsha 1536 adamdyq oryn ázirlegen. Onyń 226-sy infektsiialyq, 780-y provizorlyq, 500-i karantindik. Bul oryndarda qazir oryn jetispeýshiligi joq kórinedi. Infektsiialyq aýrýhananyń - 50%, provizorlyq mekemeniń - 65%, karantindik orynnyń - 57% bos.
Ákim orynbasary aýrýhanada oryn bola tura jetkizilgen naýqastardy nelikten qabyldamaǵanyn túsindirip ótti.
Koronavirýs juqtyrǵandar statsionarda jatyr, odan bólek pnevmoniiamen aýyrǵandar sany sońǵy aptada kúrt ósti. Búgingi tańda pnevmoniiamen túsken 360 adam em qabyldaýda. Olar úshin Qarǵaly jáne temir jol aýrýhanasynan oryn berilgen, sol jerde qabyldaidy. Degenmen, turǵyndar ózderiniń turǵylyqty jeri boiynsha aýrýhanaǵa barǵysy keledi. Sol sebepti temirjol aýrýhanasyna adamdar kóptep baryp, ol jerde belgilengen orynnan asyp ketken. Naýqastardy basqa jerge jiberý boiynsha narazylyqtar boldy. Ol boiynsha tiisti sharalar júrgizildi, dárigerlerden túsinikteme alyndy. Olardy da túsinýge bolady, em jasaimyz dep kún-túnge qaramai jumys istedi. Tipten 3 aidan beri úilerin kórmesten jataqhanada turyp jumys istep jatyr, - dedi Nurjaýǵan Qalaýov.
