Akter Tom Henks zaiyby Rita Ýilsonmen birge Avstraliiada koronavirýsqa tapsyrǵan synamasynyń qorytyndysy oń bolǵanyn aityp berdi, dep jazady VVS.
63 jastaǵy Henks pen onyń zaiyby Kvislendte sýyq tiiý belgileri paida bolǵan soń, meditsinalyq kómekke júgingen. Bul týraly akter Instagramdaǵy paraqshasynda jazdy.
Endi olar úidegi karantinde otyratyn bolady.
Akter men onyń zaiyby Kvislendtiń Altyn jaǵalaýynda ýaqyt ótkizgen. Bul jerde Henks Elvis Presli týraly filmdi túsirý jumystaryna qatysty.
Henks Instagramda: «Biz ózimizdi azdap sharshaǵandai sezindik. Sýyq tiiý belgileri paida bolyp, denemiz aýyrdy. Rita azdap qaltyrap júrdi. Sondai-aq, dene qyzýymyz da bolǵan. Koronavirýsqa test tapsyrsaq, olar oń bolyp shyqty» dep jazǵan.
Henks áieli ekeýiniń jaǵdaiy týraly barlyǵyn habardar etip otyratynyn jáne úidegi karantinde qajetti ýaqyt ótkenshe otyratynyn habarlady.
