Tanymal kino jáne teatr akteri Azamat Satybaldy Temirbek Júrgenov atyndaǵy Qazaq ulttyq óner akademiiasynyń rektory bolyp taǵaiyndaldy. Bul týraly Qazaqstan Ulttyq mýzeiiniń direktory Arystanbek Muhamediuly jelidegi paraqshasynda habarlady.
"Qurmetti dostar, tanymal kino jáne teatr akteri, telejúrgizýshi, Qazaqstannyń eńbek sińirgen qairatkeri Azamat Satybaldyny T.Q. Júrgenov atyndaǵy Qazaq ulttyq óner akademiiasynyń rektory bolyp taǵaiyndalýymen shyn júrekten quttyqtaimyn!
Óner adamynyń taǵdyry erekshe! Qalyń kórermen qaýym Azamatty teatr jáne kino óneriniń damýyna ólsheýsiz úles qosyp júrgen daryny erekshe óner iesi retinde tanidy.
Stiven Kingtiń «Tabysty adam men talantty adamnyń jalǵyz aiyrmashylyǵy – erinbei eńbek etýinde» degen keremet sózi bar. Biliktiligi men bilimin, iskerligi men jigerin oraily ushtastyra bilgen Azamattyń qazaq óneriniń bolashaqtaǵy bet-beinesin qalyptastyratyn naǵyz kásibi mamandar daiyndaý baǵytynda barlyq qarym-qabiletin jumsaitynyna senimim mol.
Azamat Satybaldyulyn jaýapty qyzmetke taǵaiyndalýymen quttyqtai otyryp, aldaǵy qyzmetine səttilik jáne tabys tileimin!", - dep jazdy Muhamediuly.
Aita keteiik, ol buǵan deiin Ǵabit Músirepov atyndaǵy Qazaq memlekettik akademiialyq balalar men jasóspirimder teatrynyń direktory boldy.
Azamat Satybaldy 1977 jyly Jambyl oblysynyń Rysqulov aýdanynda dúniege kelgen. Kópbalaly otbasynda týǵan. Úidegi toǵyz balanyń kenjesi. 1997 jyly Temirbek Júrgenov atyndaǵy Óner akademiiasyna oqýǵa qabyldandy. 2000 jyly diplomdyq jumysyn qorǵaýǵa Qostanai oblystyq drama teatryna jiberildi.
2001 jyly diplomyn alyp, Muhtar Áýezov atyndaǵy memlekettik akademiialyq drama teatryna jumysqa ornalasty.
"Aǵaiyndy", "Jeruiyq", "Ǵashyq júrek-2", "Synyptastar", Qara shańyraq", "Reketir-2", "Úige aparar jol", "Juldyzdar toǵysqanda" jáne taǵy basqa kóptegen filmge tústi.
