Rixos Water World Aktau kópfýnktsionaldy týristik-qonaq úi kesheninde barlyq kontserttik shara toqtatyldy, dep habarlaidy "Ult aqparat".
Bul týraly Mańǵystaý oblysy ákiminiń orynbasary Gúlmira Qalmuratovanyń tóraǵalyǵymen ótken koronavirýstyń taralýynyń aldyn alý jónindegi aimaqtyq shtabtyń otyrysynda aityldy.
Eki kúnge sozylǵan jiynǵa prokýratýra, politsiia departamenti, «Atameken» kásipkerler palatasynyń ókilderi men oblystyq máslihattyń depýtattary jáne kásipkerler qatysty.
Jiyn barysynda jedel shtabtyń músheleri óńirdegi epidemiologiialyq ahýaldyń nasharlaýyna bailanysty birqatar shekteý sharasyn engizdi.
«Saǵat 20:00 -den keiin Rixos Water World kesheniniń aýmaǵynda eshqandai shara ótpeýi tiis. Barlyq qyzmet jeke bólmelerde kórsetilýi qajet. Keshen aýmaǵyndaǵy kontsert pen oiyn -saýyq sharalaryn toqtatasyzdar. Keshen aýmaǵyna monitoring top baqylaý júrgizedi. Epidemiologiialyq jaǵdaidyń nasharlaýyna bailanysty sanitariialyq dárigerdiń barlyq talaby oryndalýy qajet. «ASHYQ» jobasy aiasynda jumys istep jatqan kásirkerlik nysandar zań aiasynda, karantin talaptaryn saqtai otyryp jumysyn jalǵastyrady. Alaida adam kóp shoǵyrlanatyn oryndarda jiyn, kontsert ótkizýge qatań tyiym salynady. Mundai sharalar óńirdegi epidemiologiialyq ahýaldyń nasharlaýyna bailanysty qolǵa alynyp otyr. Biz úshin eń bastysy - turǵyndardyń densaýlyǵy, halyqtyń amandyǵy. Sondyqtan el basyna qiyndyq túsken ýaqytta el úshin birigip jumys isteitin ýaqyt jetti»,- dedi Gúlmira Qalmuratova.
«Rixos Water World Aktau» kesheniniń bas menedjeri Serik Isaǵalievtiń aitýynsha, keshen ASHYQ jobasynyń aiasynda jumys istep tur.
«Biz «Ashyq» jobasy boiynsha jumys istep jatyrmyz. Qaýlyǵa sáikes, qonaq úidi 50% -ǵa deiin ǵana toltyramyz. Aita keteiik, qonaqtardyń 90 paiyzy Nur-Sultan men Almaty qalalarynan kelgender. Bizdiń qyzmetkerler ekpeni belsendi túrde alyp jatyr. Kúnine 5-10 adam vaktsina alady. Tamyz aiynan bastap kelýshilerden PTR testin talap etemiz. Epidemiologiialyq ahýal qalpyna kelgenshe qonaqúi aýmaǵyndaǵy kontsertterdi toqtatýǵa jumystanamyz», - dedi Serik Isaǵaliev.
Óz kezeginde Gúlmira Qalmuratova monitoring toptarynyń sanyn kóbeitip, olardyń jumysyn kúsheitý maqsatynda quramyn ózgertýdi tapsyrdy.
Oblys ákimi orynbasary olardyń quramyna depýtattardy, erikti jastardy qosýdy tapsyrdy.
Nátijesinde Aqtaýdaǵy karantin talaptarynyń saqtalýyn qatań baqylaityn monitoring toptarynyń sany 12-ge deiin kóbeitildi.
Budan bólek, Jańaózen qalasy men aýdandardaǵy toptardyń sanyn ulǵaitý júkteldi.
