Foto: 2Gis
Aqtaý qalasyndaǵy №1 mektep pen basqa da bilim berý uiymdaryna qatysty áleýmettik jelilerde tarap jatqan jalǵan aqparattarǵa bailanysty Mańǵystaý oblysynyń politsiia departamenti men Bilim basqarmasy resmi málimdeme jasady, dep habarlaidy Ult.kz.
Taraǵan aqparat shyndyqqa janaspaidy
Messendjerlerde «№1 mektepte kepilge alynǵandardyń biri ustaldy» degen málimet taraǵan. Politsiia bul aqparattyń feik ekenin naqty aitty.
Politsiia departamentiniń dereginshe, 2025 jylǵy 8 qarashada «102» nómirine 4-shaǵynaýdanda mas kúide júrgen er adam týraly habarlama kelip túsken. Patrýldik politseiler atalǵan azamatty anyqtap, QR ÁQBtK 440-baby boiynsha ákimshilik hattama toltyrǵan. Bul jaǵdai mektepterge qatysty qaýesetpen bailanysy joq.
Terakt týraly aqparat ta jalǵan
Áleýmettik jelilerde taraǵan «terakt qaýpi bar» degen habarlamalar da shyndyqqa sáikes kelmeitini atap ótildi. Politsiia barlyq mektepterdi tekserip, ǵimarattardyń tolyq qaýipsiz ekenin rastady. Ár bilim berý uiymyna arnaiy aktiler berildi.
Mektepter shtattyq rejimde jumys isteidi
Mańǵystaý oblysynyń Bilim basqarmasy 2025 jylǵy 10 qarashada Aqtaý qalasyndaǵy barlyq mektepte sabaqtar dástúrli formatta, kestege sáikes ótetinin habarlady. Oqý protsesine qaýip tónip turǵan joq.
Ár mektepte qaýipsizdikti kúsheitý maqsatynda ýchaskelik politsiia qyzmetkerleri kezekshilik atqarýda.
Qaýeset taratqandar jaýapkershilikke tartylady
Óńirlik politsiia feik aqparat taratý faktilerin tekserip, kórineý jalǵan málimet taratqandardy zań boiynsha jaýapkershilikke tartatynyn eskertti. Azamattardy tek resmi aqparat kózderine senýge jáne rastalmaǵan málimetti taratpaýǵa shaqyrady.
