Bilim kúni Aqtaýda zaman talabyna sai qos memlekettik mektep ashyldy. Sonyń biri 34 shaǵyn aýdanda ornalasqan №19 mektep-gimnaziiasy, dep habarlaidy "Ult aqparat".
1200 oryndyq bilim ordasynda 17 birinshi synyp ashyldy.
Aimaq basshysy Serikbai Trumov jańa mekteptiń ustazdary men ata-analaryn jáne oqýshylardy aitýly kúnmen quttyqtap, tabys tiledi.
«Búgin jarqyn da qýanyshty mereke – Bilim kúninde barlyq talapqa sai jańa mektep ózderińizge esigin aiqara ashyp jatyr. Dál osy kúnnen bastap, alǵashqy qońyraý únimen birge, ár adam ómiriniń jeke tulǵa jáne azamat retinde qalyptasý kezeńi bastalady. Biylǵy oqý jyly barlyq sanitarlyq talaptardy saqtai otyryp, dástúrli formatta bastalady. Bizdiń mindetimiz - sońǵy eki oqý jylyndaǵy oqý-tárbie protsesindegi kemshin tustaryn toltyrý, oqýshylarǵa qolaily jaǵdai jasaý, balalar qaýipsizdigin qamtamasyz etý», - dedi oblys ákimi.
Saltanatty jiynda birinshi synyptyń oqýshylaryna oblys ákimi «Álippe» oqýlyǵyn tabystady. 2-11 synyp oqýshylaryna Qazaqstan Respýblikasy Táýelsizdiginiń 30 jyldyǵyna orai «Táýelsizdik jetistikteri» atty synyp saǵattar uiymdastyryldy. Synyp saǵattary ár synyp úshin jeke kabinetterde sanitarlyq talaptardy saqtai otyryp ótkizildi.
Jańa mektepte mýltimediialyq oqý zaldary, zamanaýi jabdyqtalǵan fizika, himiia, biologiia, informatika, mýltimediialyq kabinetter, interbelsendi taqtalarymen jabdyqtalǵan, tehnologiia kabinetteri jabdyqtalǵan. Sondai-aq, mektep aýmaǵynda halyqaralyq standartqa sai sporttyq oiyn alańdary, júgirý joldary jáne demalýǵa arnalǵan oryndar ornalasqan. Ǵimaratqa beinebaqylaý júiesi, dabyl túimesi ornatylyp, internet jelisi tartylǵan.
Atalǵan mektepke ustazdar quramy erekshe tásilmen qabyldandy. Qoǵam belsendilerinen arnaiy komissiia qurylyp, muǵalimderdiń úzdikteri túrli suraqqa jaýap berý arqyly tańdap alyndy. Saidyń tasyndai iriktelgen 160 pedagog jańa mektepte shákirt tárbieleitin bolady.
Búgin oblys kóleminde 2 memlekettik, 5 jekemenshik mektep ashylyp, paidalanýǵa berildi. Al, aldaǵy 5 jylda taǵy da jańa otyzǵa jýyq mekteptiń qurylysyn salý josparlanýda.
