Mańǵystaý oblysynda narazylyqqa shyqqan jedel járdem qyzmetkerleri jumystan shyǵarylýy múmkin. Sot olardyń narazylyǵyn zańsyz dep tanydy, - dep habarlaidy Tengrinews.kz tilshisi KTK telearnasyna silteme jasap.
Telearna málimetinshe, jalaqy kóterýdi, áleýmettik paketti jáne feldsherler men jedel járdem brigadalarynyń sanyn kóbeitýdi talap etken qyzmetkerler alty kún qatarynan jumysqa shyqpaǵan.
Jumysqa shyqpaǵan qyzmetkerleriniń áreketine kelispegen basshylyq sotqa júgingen. Sot isti zerttei kele zańsyz degen qorytyndyǵa kelgen. Óitkeni narazy top narazylyqqa shyqpastan buryn basshylyqqa resmi hat joldaýy kerek eken. Onda kelispeýshilikterdiń tizimin, talaptaryn, narazylyqtyń ótetin orny men ýaqyty da kórsetilýi kerek.
"Qazirgi tańda narazylyq zańsyz dep tanyldy. Qyzmetkerler jumysqa kelmei, narazylyqtaryn jalǵastyrǵan jaǵdaida tártiptik jaza qoldaný qarastyrylady", - dedi Aqtaý qalalyq №2 sotynyń sýdiasy Rahymjan Beisenov.
