Aqtaýdaǵy atyshýly plastik qyzǵaldaqtardy otyrǵyzǵan kompaniia - Clover Media Group JShS-niń tenderden 300 million teńge utyp alýyna qatysty jergilikti ákimdik túsinik berdi, - dep habarlaidy Tengrinews.kz.
Jaqynda Azattyq Ruhy jáne ProTenge buqaralyq aqparat quraldary Clover Media Group kompaniiasy "Aqtaý qalalyq turǵyn úi-kommýnaldyq sharýashylyǵynyń" qalany jaryqtandyrýǵa qatysty tenderin utyp alǵanyn jazǵan bolatyn. Áńgime memlekettik biýdjetten 300 million teńge bólinýi týraly bolmaq.
Aqtaý ákimdigi qalany jaryqtandyrý jumystarymen Clover Media Group JShS ainalysatynyn rastady. Biraq, ákimdik baspasóz qyzmetiniń málimetinshe, barlyq jumys demeýshilerdiń qarajaty esebinen isteledi.
"Aqtaý qalasyn túngi jaryqtandyrýǵa jańa estetikalyq dem berý maqsatynda aimaqtyń metsenat kompaniiasy demeýshilik kómek retinde 300 million teńge bóldi", - delingen habarlamada.
Jumystar tolyq aiaqtalǵannan keiin merdigerlik uiym jyl sońyna deiin tehnikalyq qyzmet kórsetý men kútip ustaýdy júrgizetin bolady, sebebi "buǵan biýdjetten qarajat bólinbegen".
"Demeýshi kompaniiadan qarajat "Aqtaý qalalyq turǵyn úi-kommýnaldyq sharýashylyq bólimi" memlekettik mekemesiniń shotyna "qalany sándik jaryqtandyrý" boiynsha tústi. Osy qarajatqa memlekettik satyp alý portalynda kelisimshart jasaldy", - dedi ákimdik ókilderi.
