Aqtaý qalasynda órt sóndirýshiler órtti tolyq sóndirmei ketip qalǵan. Videojazbaǵa tótenshe jaǵdailar komiteti túsinikteme berdi, dep jazady Sputnik.
Aqtaý mańyndaǵy Atameken aýylynda órt shyqqany týraly habarlama 23 sáýir kúni keshki altynyń shamasynda túsken.
Oqiǵa ornyna dereý alty adamnan turatyn Aqtaý qalasy SPCh-2 kezekshi qaraýyly men eki tehnika jiberilgen. Olar órt shyqqan jerge bar-joǵy segiz minýtta jetken. Jalyn eki qabatty úige tolyq sharpyǵany anyqtaldy, órttiń jalpy aýmaǵy – 150 sharshy metr.
Sý segiz jáne alty tonnalyq tsisternalardan úidiń ishi-syrtyna bir mezgilde tartyldy, dep atap ótti órt sóndirýshiler. Qabyldanǵan sharalardyń arqasynda 18 saǵat 26 minýtta órt aýyzdyqtaldy.
"Sonymen birge, órttiń taralýyn toqtatý úshin kóp kólemde sý berilgendikten, 22-25 minýttan keiin, iaǵni saǵat 18:30-da tsisternalardaǵy sý taýsylǵan", - dep habarlady tótenshe jaǵdailar komitetiniń baspasóz qyzmeti.
Osydan keiin órt sóndirýshiler shuǵyl túrde sý toltyryp kelýge jóneltilgen. Alaida jaqyn mańdaǵy sýmen qamtamasyz etý jelisinde sý joq bolyp shyqqan, óitkeni ol eldi mekende sý belgili bir ýaqytta ǵana beriledi eken.
Sý quiatyn jalǵyz oryn eldi mekennen úsh shaqyrym jerde ornalasqan aýyldyń sorǵy stantsiiasy ekeni belgili boldy.
Osylaisha, órt sóndirý qyzmetkerleri órtti sóndirý úshin sý qoryn toltyrýǵa qosymsha ýaqyt jumsaýǵa májbúr boldy. Kýáger videoǵa túsirgen tehnikalar sý quiýǵa ketken sátten bastap qaityp oralǵanǵa deiin 26 minýt ótken. Osy ýaqyt ishinde oqiǵa ornynda qalǵan órt sóndirýshiler jergilikti turǵyndarmen birge órttiń taralýyna jol bermeýge tyrysqan.
"Órt saǵat 19:21-de tolyq sóndirildi", - dedi TJK baspasóz qyzmeti.
Órtti sóndirýge barlyǵy jeke quramnyń 11 adamy men 3 tehnika qatysty.
