Mańǵystaýda karantin kezinde toi ótkizgenderge aiyppul salyndy. Bul jóninde oblystyń qoǵamdyq kommýnikatsiia ortalyǵy habarlady.
«Aqtaý qalasynda ótken toidan túsirilgen videomaterial faktisi boiynsha jergilikti politsiia qyzmeti men taýarlar men kórsetiletin qyzmetterdiń sapasy men qaýipsizdigin baqylaý basqarmasynyń qyzmetkerleri saltanatty sharanyń ótken orny men onyń iesiniń kim ekenin anyqtady. Atalǵan basqarma toihananyń iesin Ákimshilik quqyq buzý kodeksiniń 425-baby 1-bóligimen ákimshilik jaýapkershilikke tartý máselesin qozǵap jatyr. Mańǵystaý oblysynyń politsiia departamenti atalǵan sharany uiymdastyrýshylardy anyqtaý úshin jumys júrgizýde», - deidi taýarlar men kórsetiletin qyzmetterdiń sapasy men qaýipsizdigin baqylaý komitetiniń resmi ókili Erjan Baitanaev.
Sondai-aq, Mańǵystaý oblysy energetika basqarmasynyń qyzmetkerine qatysty kópshilik sharany ótkizý faktisi boiynsha Ákimshilik quqyq buzý kodeksiniń 425-baby 1-bóligimen 30 AEK mólsherinde aiyppul salynyp, ákimshilik hattama toltyryldy.
Osy jaǵdai boiynsha qazir Mańǵystaý oblystyq ákimshiligine jáne memlekettik qyzmet isteri jónindegi agenttik departamentine odan ári shara qoldaný jóninde resmi hat joldandy.
Sonymen qatar toi ótkizilgen orynnyń menshik iesine qatysty da hattama toltyrylyp, 230 AEK mólsherinde aiyppul salyndy.
