Foto: Túsirilim alańynan
Unico Play «Qara bekire» atty keń aýqymdy qazaqstandyq telehikaia túsirip jatyr. Bul joba otandyq kinematografiiaǵa degen kózqarasty túbegeili ózgertýi múmkin. Fort-Shevchenkonyń qatal tabiǵaty men Aqtaýdyń óndiristik koloriti — Kaspii mańyndaǵy áleýmettik jáne ekologiialyq máselelerdi kún tártibine qoiatyn shielenisti oqiǵanyń basty alańyna ainalady.
Sońǵy zertteýlerge sáikes, Kaspii teńizi tartylyp, sýdyń deńgeii 70 sm-ge túsip ketken, al keibir jerlerinde 50 shaqyrymǵa jýyq teńiz tabany qurlyqqa ainalǵan. Bul ózgeris óńirdiń bioalýandyǵy men tirshiligine úlken qaýip tóndirýde. Bekire, belýga, orys jáne juldyzsha bekire balyqtarynyń popýliatsiiasy shamadan tys aýlaý men tabiǵi mekeniniń buzylýy saldarynan 90%-dan astamǵa azaiǵan. Bul derekterge túsinikteme berýdiń qajeti shamaly*. Endi problemany ekran arqyly kópshilikke kórsetetin ýaqyt keldi.
Aǵaiyn men tabiǵat týraly drama
On jyl túrmede otyrǵan Nurbol 2012 jyly týǵan jeri — Aqtaýǵa oralady. Biraq shyndyqty estigende tóbe shashy tik turady: inisi Azat qara ýyldyryqpen ainalysatyn brakonerlik toptyń múshesi. Nurbol týǵan baýyryn qutqarý úshin taǵy da qylmys keń taralǵan jáne adam qolynan ýlanǵan sý asty álemine kirýge májbúr bolady. Munda adamdar óz-ózimen ǵana emes, tabiǵattyń ózi — adam qolynan jaralǵan stihiiamen kúresedi.
Foto: Túsirilim alańynan
Áleýmettik salmaq pen janrlyq úilesim
«Qara bekire» — bul qarapaiym qylmystyq saga emes. Bul telehikaiada otbasy ishindegi emotsionaldy qaqtyǵys pen qazaqstandyq «shyǵys vestern» toǵysady. Munda otbasylyq bailanystyń úzilýi, ekologiialyq apat, brakonerlik jáne qylmystyń órshýi siiaqty taqyryptar kóteriledi — jáne osynyń barlyǵy adamnyń ózi sebep bolǵan apat aiasynda órbidi.
Tájiribeli mamandar men jańa talanttardan quralǵan top
Rejissýrany Berik Jahanov esimdi myqty jas daryn qolǵa alǵan. Al jobanyń bas prodiýserleriniń biri — Anara Jýnýsova.
«Bul jai ǵana serial emes — bul jan aiqaiy. Biz shynaiy adamdar týraly, shynaiy Kaspii týraly jáne shynaiy qiynshylyqtar týraly aitamyz. Bul telehikaiada teńiz — jai ǵana fon emes, bul — tiri keiipker. Biz osy keiipkerlerden adamdar ózin tanyǵanyn qalaimyz», — deidi bas prodiýser Anara Jýnýsova.
Joba qazaqstandyq kinoǵa jańa esimder syilamaq. Unico Play komandasy qashanda tanymal juldyzdarǵa ǵana emes, talantty jańa akterlerge de múmkindik berýdi maqsat etedi.
«Bizdiń maqsatymyz — jai ǵana kino túsirý emes, kórermenniń júregine jetetin, shynaiy dúnie jasaý. Sol úshin tájiribesi mol akterlerdi de, jańa talanttardy da shaqyramyz. Kórermen ekrannan Damir Amangeldin, Aqjol Primbetov, Almagúl Saǵyndyq siiaqty kópshilikke jaqsy tanys esimdermen birge jańa keiipkerlerdi kórgende, bul árdaiym qyzyqtyryp, baýrap alady. Mundai jańa tynys oqiǵaǵa da, jalpy indýstriiaǵa da serpin beredi. Bizdiń jaǵdaida bul serpindi Eldos Shaikenov pen Maqsat Rahmet alyp shyǵady. Olar teatr sahnasynda jaqsy tanys bolsa da, endi úlken aýditoriiany baǵyndyrýǵa daiyn», — deidi Anara Jýnýsova.
Serial túsirilimindegi eń kúrdeli synaqtardyń biri — ashyq teńizdegi kórinister boldy.
«Aqtaý men Mańǵystaý oblysy turǵyndaryna bizdi jyly qabyldap, kómek kórsetkenderi úshin alǵys aitamyz. Turǵyndar barynsha bizdi qoldap, kerek kezde qol ushyn bergenderiniń arqasynda túsirilimniń sý astyndaǵy eń qiyn ekshn sahnalary esh kedergisiz ótti. Kaspii teńizin erekshe atap ótkim keledi – jumys barysynda aýa-raiy buzylyp, túsirilim kúnderi keiinge shegerilgen joq. Tabiǵattyń osy bir syiyn jaqsylyqtyń nyshany, sáttiliktiń belgisi dep qabyldadyq», - deidi jobanyń prodiýseri Anna Chekirtova.
Osy joba úshin arnaiy tanymal mamandar shaqyryldy. Olardyń ishinde «Qash», «Janym, senbeisiń!», «Kelinka Sabina» syndy jobalarmen tanylǵan qazaqstandyq operator Azamat Dýlatov jáne «Goliaf», «Dala qasqyry», «Nýlevye» filmderi arqyly tanymal qoiýshy-sýretshi Ermek Ýtegenov bar. Túsirilimde sýasty kameralary, tabiǵi jaryq, sondai-aq akterlerge ekstremaldy jaǵdaida jumys isteýge múmkindik beretin barlyq saqtyq sharalary qoldanylýda. Mundai tásil kórermendi shynaiy ári áserli atmosferaǵa elitip áketetin kórkem orta jasaidy.
Anyqtama
Serial: «Qara bekire»
Óndirýshi kompaniialar: Unico Play, Taurus Asia production
Janr: áleýmettik drama, ekodrama
Bas prodiýserler: Anara Jýnýsova, Vasilii Kýtsenko, Irina Sosnovaia, Beksultan Qazybek
Prodiýser: Anna Chakirtova
Atqarýshy prodiýser: Janara Týrpatova
Qoiýshy rejisser: Berik Jahanov
Ideia avtorlary: Anara Jýnýsova, Dias Bertis
Stsenarii avtorlary: Elena Lisasina, Nurbol Erboluly, Qýanysh Stahanov, Alen Rahmetaliev, Raiymbek Áljanov, Darhan Ospanov, Aidos Kemádildaev, Ásel Qadyrseiit
Basty rólderde: Damir Amangeldin, Eldos Shaikenov, Maqsat Rahmet, Almagúl Saǵyndyq, Meiirǵat Amangeldin, Aqjol Primbetov, Bolat Uzaqov, Ádiljan Shombalov, Aidar Karimbaev, Syrym Qashqabaev, Merei Makajan, Aleksei Shemes
Qysqasha sinopsis:
On jyl túrmede otyrǵan Nurbol Aqtaýǵa qaita oralyp, jańa ómir bastap, inisi Azatpen tatýlasqysy keledi. Alaida bul ońai bolmaidy. Óitkeni Azat brakonerlik toptyń belsendi múshesi, onyń jetekshisi — Nurboldyń burynǵy dosy Qairat. Azat aǵasyn ákesiniń ólimi úshin kinálaidy.
Kaspiidiń tartylýy men balyq sharýashylyǵyna talas fonynda qylmystyq toptar arasynda qaqtyǵys órshi túsedi. Qairattyń qarsylastary — Sapardyń toby Azatty tutqynǵa alǵan soń, Nurbol ony qutqarý úshin qylmystyq álemge qaita kiredi.
Sonymen qatar, balyq inspektory Malika brakonerlerge qatysty aýqymdy jemqorlyq shemasyn tergep jatyr. Kútpegen jerden onyń joly Nurbolmen toǵysady, olardyń arasynda sezim paida bolady — biraq Malika onyń kim ekenin bilmeidi.
